E siman aki Aruba a ricibi Rene van Nes, kende ta e hefe di delegacion di Union Europeo staciona na Guyana. Van Nes a inicia su periodo di cuater aña na Guyana den luna di september 2022 y esaki ta su prome bishita na e islanan Hulandes, incluyendo Aruba.
Durante su bishita, van Nes a reuni cu Minister President mr. Evelyna Wever-Croes y mr. Geoffrey Wever Minister di Asuntonan Economico, Comunicacion y Desaroyo Sostenibel pa intercambia idea y revisa algun proyecto andando. Tambe lo revisa futuro proyecto, cual ta financia door di Union Europeo.
Un combersacion hopi ameno unda ambos banda a enfatisa riba e colaboracion entre Aruba y e delegacion y Union Europeo. Tambe a uza e oportunidad pa combersa riba e planificacion di e fondonan nobo cu Aruba lo ricibi pa e programa di E-Government cu Gobierno di Aruba ta preparando.
Actualmente e facultad nobo di STEM na Universidad di Aruba (SISSTEM) ta financia door di Union Europeo. Esaki, entre otro, ta e proyecto di mas grandi actualmente tumando luga cu ta financia pa UE.
Durante su estadia na Aruba, van Nes lo bishita Universidad di Aruba y e area di renobacion di Maria Convent y por a observa e avancenan den e renobacion. Van Nes tambe lo bishita algun proyecto mas chikito manera e proyectonan di RESEMBID, cual tambe ta financia via di e fondonan Europeo regional cu ta entre otro ‘Turning the Tide’, ‘Aruba’s Public Safety and Multi-Hazard Early Warning System’ (EWS) y ‘Validation of replicable methods for coastal ecosystem monitoring’.
Tambe van Nes lo haci un bishita na Parke Arikok pa cual den pasado tabata financia door di Union Europeo. Van Nes tambe a duna un lectura na Universidad di Aruba.
