Recientemente henter e industria di cuido medico na Aruba a uni den un solo carta cu nan a manda dia 12 di januari 2021 pa Minister di Salud Publico, Dangui Oduber. Den e carta e entidadnan ta bati alarma y ta adverti gobierno di consecuencianan desvastado pa e sector di cuido si continua cu e plan pa corta 60 miyon florin e aña aki. Ni AZV ni Hospital y pio IMSan, RESPALDO y otro institutonan di cuido ta cla pa un reduccion asina substancial den nan entrada anual. Pero Minister Dangui Oduber a contesta nan carta diahuebs dia 28 di januari, invitando nan pa drenta un comision pa hunto corta e gastonan di cuido medico.
Minister Dangui Oduber a splica e dunadonan di cuido hunto cu e representante sindical di e trahadonan den cuido cu recientemente Gobierno di Aruba a manda pidi Gobierno di Hulanda pa para e cortamento y spaarmento den gastonan di cuido medico. Lamentablemente, segun Minister Oduber, te ainda Gobierno di Hulanda no a contesta e peticion di Aruba. Ta spera cu pa e siman cu ta bin lo por haya un contesta di Madre Patria, cu na e momentonan aki ta esun cu ta cubriendo mayoria debe di pais Aruba, debi na un caida drastico den nos entradanan pa motibo entre otro di e pandemia y limitacion di turismo.
Pero sperando riba un contesta di Gobierno di Hulanda riba e peticion pa para e cortamento di gasto den sector di cuido, Conseho di Minister di Aruba a dicidi diabierna dia 22 di januari 2021 pa institui un comision nacional y multidisciplinario cu e meta pa den dos luna di tempo, presenta un conseho na Minister di Salud Publico con y unda pa corta gastonan den cuido medico.
E comision nacional y multidisciplinario aki ta consisti di representantenan di Ministerio di Salud Publico como presidente, hunto cu otro entidadnan manera ta e Raad van Bestuur e “Stichting Ziekenverpleging Aruba” cu ta maneha Dr. Horacio E. Oduber Hospitaal, Instituto Medico San Nicolas (IMSan), Raad van Bestuur di FSMA Respaldo, Stichting Algemene Bejaardenzorg Aruba (SABA), Huisartsenvereniging Aruba (HAVA), Vereniging Medisch Specialisten Aruba (VMSA), asosacion di boticanan di Aruba, Arubaanse Vereniging van Fysiotherapeuten, Vereniging van specialisten Ziekenhuis Aruba, Aruba Dental Society, Vereniging Verloskundigen Aruba, Vereniging Apothekers Aruba y e Arubaanse Bond voor Verpleegkundigen (ABV).
Minister Dangui Oduber a sigura e participantenan den e comision, cu e lo tuma un decision despues di haya conseho di e comision aki dos luna. E mandatario a probecha invita e miembronan di e comision pa un prome reunion otro siman caba, pa hunto cuminsa prepara un conseho integral riba con atende cu e gastonan di cuido medico y pa evalua unda tur por corta y na unda no por baha gasto.
Mester menciona cu Gobierno di Hulanda a menciona na mas di un ocasion, cu nan no a pidi specifico pa corta den gastonan di cuido medico. Nan a pone como condicion pa Gobierno di Aruba, cu mester corta nan gastonan pa por haya fiansa. Den esey, gobierno di Aruba mes a presenta e plan pa corta den salud publico, basa riba un conseho di un compania priva. Awo ta resulta cu no a scucha esunnan trahando den cuido prome cu a yega na tal decision, pa gobierno por a compronde miho e consecuencianan di e decision aki. E sector di cuido ta sigura Gabinete Wever-Croes cu nan ta core un risico grandi di perde un cantidad di specialista, cu e tempo di espera pa mira un dokter of specialista lo aumenta drasticamente y cu publico lo bira mas malo y sin acceso facil na cuido.
Di otro banda, na momento cu gobierno pidi Hulanda pa no sigui cu e cortamento den sector di salud, e pregunta lo bin bek na Gabinete Wever-Croes, na unda si lo corta e 60 miyon anto. P’esey, adelantando riba e pregunta aki, ta cuminsa cu un reevaluacion cu e comision pa analisa tur gasto di cerca y repasa unda si por corta sin cu e tin consecuencia devastado pa e pashent y cuido medico en general. Expertonan ta sigura cu sigur lo tin algun area unda por promove mas eficiencia, pero ta imposibel yega na 60 miyon pa aña, net den un pandemia den cual sector di cuido medico ta bou un presion nunca bisto!
