Riba diahuebs 12 di november, Gobernador di Aruba, Su Excelencia Alfonso Boekhoudt, a haci un bishita di trabou na Marinierskazerne Savaneta (MSKSAV). LTKOLMARNS Art van Beekhuizen, Comandante di Marinierskazerne, y KAPTMARNSAR Richard Kelly, Hefe di ARUMIL, a ricibi Gobernador.
Meta di e bishita aki tabata pa Gobernador haya un bista riba e forma di traha di Formacion Social (SVT) durante e temporada actual di COVID-19. Formacion Social (SVT) ta un proyecto cu a implementa a base di e tareanan di Comandancia di forsa maritimo den Caribe (CZMCARIB) y e palabracionnan haci cu gobierno di Pais Aruba.
E mariniernan Arubiano di Milicia di Aruba (ARUMIL) ta encarga cu e entrenamento. Meta di SVT ta pa prepara e hobennan entre 18 pa 24 aña di edad, pa un trabou. Durante di un periodo di 4 luna nan ta siña norma y balornan (militar) poniendo enfasis ariba beneficio y importancia di disciplina, structura, ‘teamwork’ y respet mutuo.
Durante di e bishita di trabou gobernador a haya un presentacion tocante e curso di SVT. Tambe a ilustra por medio di un ‘shortfilm’ con e entrenamento amfibio di SVT ta bay. Den esaki ta test colaboracion, comunicacion y resistencia mental den combinacion cu un estimulo fisico. Inicialmente e trayecto di SVT 13 lo a cuminsa riba 9 di maart ultimo pero despues di e brote mundial di COVID-19 a suspende esaki.
Riba 24 di augustus e cursistanan a resumi e curso. Despues esnan cu a finalisa e curso cu exito lo ricibi nan diploma.
