Presidente di FIFA, Gianni Infantino, a elogia e proyecto ‘FIFA Forward 7 – Turf Project’, unda tabata tin e ceremonia di rol e turf, cu Arubaanse Voetbal Bond (AVB) ta desaroyando na Aruba, calificando e iniciativa como uno di e proyectonan mas bunita cu FIFA a apoya. Durante su discurso n’e apertura di e proyecto na cancha di Nacional, Infantino a destaca cu e iniciativa tin potencial pa cambia no solamente e panorama deportivo, sino tambe e bida di hopi mucha na Aruba.
Infantino a felicita presidente di AVB, Randolf Lacle, pa su vision y a describi su idea como “loco”, pero den e miho sentido di e palabra: un vision cu ta transforma idea den accion. E presidente di FIFA a sigura cu e organisacion lo promove e proyecto na nivel mundial, pa Aruba bira un ehempel di loke un vision ambicioso por logra cu sosten y cooperacion.
E proyecto ta contempla shete cancha di futbol, cu segun Infantino lo brinda mas oportunidad na mucha homber y mucha muhe pa practica deporte y desaroya nan talento. El a bisa cu futbol ta pertenece na tur hende, sin importa si un pais ta grandi of chikito, y cu FIFA tin como tarea crea oportunidad y busca recurso pa yuda paisnan transforma nan aspiracion den realidad.
Infantino a destaca tambe e participacion reciente di e seleccion nacional masculino U-15 di Aruba den e prome FIFA U-15 World Cup and Festival. El a felicita e hoben futbolistanan pa nan participacion y menciona specialmente e empate 4-4 contra Croacia, un pais cu su seleccion nacional a alcansa semifinal den dos Mundial anterior.
Pa otro aña FIFA lo organisa un festival mundial U-15 pa mucha muhe, cu invitacion pa tur pais. El a indica cu e intencion ta pa duna tanto mucha homber como mucha muhe e oportunidad di participa na un escenario internacional, conoce hoben di otro pais y experimenta con futbol ta uni hende di diferente parti di mundo.
FIFA ta aumenta fondo pa AVB
Un otro anuncio importante di Infantino ta e aumento den e fondo cu AVB lo haya pa inverti den futbol. Desde 1 di januari 2027, e federacion lo tin 25 miyon dollar disponibel durante e siguiente ciclo di cuater aña, pa inverti den proyectonan di futbol.
Infantino a compara e suma cu e fondo di un miyon dollar cu FIFA tabata asigna pa cada ciclo di cuater aña ora el a inicia su presidencia. Segun dje, e aumento ta duna AVB mas posibilidad pa desaroya proyecto, construi mas cancha y crea oportunidad pa mas mucha y adulto.
Tres shen par di sapato pa mucha na Aruba
Durante su bishita na un di e dos FIFA Arenanan na Aruba, Infantino a observa mucha cu tabata hunga futbol sin sapato. E situacion aki a habri e posibilidad pa anuncia cu Aruba lo participa den e programa Boots for All, cu tin como meta facilita sapato di futbol na mucha.
