Gerlien Luzdiane Croes ta naci na Aruba dia 7 di februari 1987, a studia na Universidad di Maastricht na Hulanda y a profundisa y specialisa den leynan Europeo, leynan internacional y den globalisacion. E ta trahando desde aña pasa na Europe House riba Sasakiweg, unda ta atende cu asuntonan di Union Europeo y relacionnan den Reino Hulandes. El a postula su mes e aña aki riba lista di AVP y a logra den su prome salida pa ricibi 982 voto di sosten riba su nomber.
For di momento cu el a cuminsa haci aparicionnan den media, a saca afor cu e ta un tremendo comunicador, e ta papia cu confiansa y como un bon conocedo di e materia. E ta simpel, pragmatico y sa di e materia y ta mustra di ta domina politica den su plant’i man.
Lamentablemente e number riba lista no tabata mes halto cu hopi lo a spera, pero asina mes esey no a kibr’e pa sigui den e lucha pa convence votadonan di su idealnan, su vision y su plannan pa introduci politica nobo na Aruba. En todo caso, su forma nobo di hiba politica a funciona y a ricibi casi mil voto den su prome eleccion, locual mayoria politiconan no ta logra normalmente.
Mesora el a sali e hende muhe cu mas voto riba lista di AVP, cu 982 voto, sigui despues pa Mervin Wyatt cu 661, Jennifer Reyes cu 588 y Lorna Varlack cu 340 voto. Compara cu e demas 7 partidonan politico, e ta e di tres hende muhe cu mas voto na Aruba, despues di Evelyn Wever y Xiomara Ruiz di MEP.
Awor ta masha interesante pa mira con partido lo haci pa acomoda e generacion nobo, cu a haya voto, den e fraccion di AVP den Parlamento. E lo ta un lastima pa laga un hoben cu asina hopi potencial for di e fraccion, pa inclui Parlamentarionan cu a bay atras den voto of politiconan cu apenas a haya 100 voto di sosten. E lo ta un berdadero berguensa pa nan mes pa acepta pa drenta Parlamento sin sosten.
Tanto partido MEP, RED y hasta POR a vocifera nan sosten caba na e idea pa permiti e politiconan cu mas voto drenta Parlamento, pues e lo ta un bon chens pa AVP tambe pa sostene e idea nobo aki.
De facto, caranan nobo hibando politica nobo a crece den AVP e biaha aki, refiriendo aki specificamente na hobennan manera Richard Arends y Gerlien Croes. Ta pensa cu ambos a atrae un mercado nobo pa e partido, di hendenan cu no necesariamente ta di borchi y bandera of di bishita di cas tur dia, sino mas bien di contenido, ideanan, vision y plan concreto pa realisa cambionan importante pa nos pais.
