Diabierna anochi, despues cu resultado di eleccion Parlamentario a drenta, lider di MEP, mr. Evelyn Wever-Croes a declara di ta dispuesto di forma un coalicion cu POR pero no cu AVP. For di e momento ey, lider honorario di MEP, Nelson Orlando Oduber a cuminsa fulmina contra e idea aki di forma un gobierno cu Partido POR.
Despues cu Lider di MEP a cera porta pa AVP, lider di AVP, mr. Mike Eman, a declara cu AVP lo bay oposicion y crea un base di confianza di mayoria di e pueblo Arubano pa proximo eleccion.
Pa e lider honorario di MEP e decision di e actual lider ta un eror historico cu lo resulta den un derota sigura pa MEP den e proximo eleccion.
Nel Oduber a skirbi diferente motibo pa esaki riba facebook: “Sin placa no tin ni amor, corda gobernacion”, indicando cu e proximo gobierno lo tin fondonan limita pa traha cune y cu esaki lo no duna nan e base pa duna pueblo locual MEP a bay eleccion cune.
Na di dos luga el a skirbi “Puntra bo mes si den politica tur cos POR y a costo di kico ta bula aden pa bay sinta riba e blaarnan cu AVP a traha pa nos”.
Di tres tema tabata “Bo ta kere cu na 2017 ainda lo tin hende kier tira un sambuya den un piscina sin awa”.
Di 4 punto tabata “Tanten cu Ministerio Publico no declara ta kende nan tin ainda pa piki, mester ta hopi cauteloso, pensa bon ariba esnan cu ayera a sali for di Cocolishi y awe ta haci comosifuera ta den Vaticano nan tabata ta”.
E di 5 comentario di Nel Oduber tabata “Den e dianan (aki) tin partido ta grita cu nan tin e yabi pa Gobierno, mescos ora Bo muri pastor tambe tin e yabi di porta di Santana pa dera politiconan cu nan mes mata nan mes politicamente!
E di 6 comentario di e Lider Honorario di MEP tabata un comparacion figurativo di con e coalicion cu POR lo resulta: “Un dori cu un scorpion den un mondi na candela banda di un rooi. E scorpion a pidi e dori cu sa landa, pa lage subi su lomba pa nan por crusa e rooi, pasobra si nan keda tera tur dos ta kima y lo muri. E dori di cu e scorpion, Bo ta bay pica mi y mi ta muri, pasobra bo no ta di confia! Bo ta bay traiciona mi! E cayente di e candela yegando mas cerca, e scorpion a logra convence e dori pa nan crusa y a bula riba lomba di e dori y nan a cuminsa crusa e rooi. Na momento cu nan a yega tera, e scorpion a bula afor y a pica e dori. E dori di cu e scorpion, mi a bisabo cu bo “no ta di confia” y e dori a muri!”.
Asina Nel Oduber a termina su facebook posts. E pregunta ta awor, tin base di confiansa pa MEP y POR bay den coalicion? Si no tin e base pa un coalicion MEP-POR, AVP-POR, ni AVP-MEP, lo tin eleccion di nobo?