Na Aruba no tin ley pa proteha comerciante, segun un representante di La Linda NV. Tur hende sa cu Caya grandi ta morto. No tin bida. La Linda tabata tin un tiki bida, pero e tabata bay bon.
Asina mes a bisa e trahadonan cu nan ta bay cera La Linda. Hopi di nan a rabia y nan a tuma e decision di bay abogado. Akinan e dolor di cabes a cuminsa, ora cu nan a bay abogado.
Doño di La Linda NV, Haime Hokman, a bisa cu si nan bay abogado, e ora nan ta bay perde. Pero e empleadonan no a compronde pasobra un persona a bin como abogado, papia cu nan. E no a splica nan cu ora cu un luga no ta bay failliet, of nan no a haya retiro di trabao, nan no ta bay haya abogado liber.
Nan a bay e abogado di nan y por a mira tambe riba 24ora.com, nan abogado Hose Figaroa a papia. Pero e no a bisa nan cu ora di bay failliet, ta perde tur cos como empleado. Prome hende cu ta haya tur placa, ta departamento di impuesto. E trahadonan ta e ultimonan cu ta haya placa, un salario of loke ta bay resta di loke La Linda tin ora e bay failliet.
E director no kier pasobra e ta haya pica pa manda hendenan cas. E idea tabata pa haya un uitstel cu yama Surseance.
Hues comisario De Leur a manda un persona, cu nan a yama un bewindvoerder, kende a actua como un curator y no ta trahando cu e director manera ley ta bisa.
Por lesa den articulo 218 verso 1 cu ta bisa bon cla, cu tin cu traha hunto cu e director.
E persona aki a bin, a seya tur porta di La Linda, y e ta habri y cera sin autoridad di e doño, siendo cu e edificio no ta di La Linda NV.
Aki ta mira atrobe con nan ta probecha di e comerciantenan. Hopi comerciante ta pasando den duro actualmente y ta hopi hende ta bay mas abao di loke nan presupuesto ta y ta pasa cu nan kier bati bancarota.
Pero ora cu bay failliet, loke algun ta haci, ta pone un otro hende firma pa nan y ta habri un negoshi bek. Esey ta loke cu La Linda no gusta como Arubiano. Den caya e unico negoshinan cu a keda habri cu ta di Arubiano, ta La Moderna (Chipi Chipi) y La Linda. Asina mes La Linda kier a haci surseance pasobra tin placa pa paga.
E meneer aki, esta e bewindvoerder ta exigi pa bay failliet. Su intencion di bay failliet ta pa e haya placa grandi, pasobra e ta cobra. Pero e ora e empleadonan no ta haya nada.
La Linda ta exigi pa ley wordo mira bon cla. Tin placa y e meneer aki ta sigui persisti cu e kier pa bati bancarota. La Linda no ta bay failliet pasobra nan intencion ta pa habri La Linda bek, pa por trece trahadonan Arubiano bek den La Linda.
Esey ta e punta cu nan ta bringando awor aki. Riba caya tur hende ta critica e director. A cera La Linda pasobra e situacion no ta bayendo bon. Pero ainda kier a dreche un tiki, haciendo un La Linda mas chikito, pasobra e Arubianonan ta pidiendo dia pa dia. Wak cuanto hende ta biniendo tur dia, awo cu e baratiyo. Awo por wak cuanto placa ta genera. E meneer aki ta bin tur atardi habri y cera porta manera cu e ta doño y ta bay cu placa. E kiermen e ta esun cu ta handle, ciendo cu e mester ta sinta hunto cu e director Haime Hockman, pa nan por dirigi La Linda como un surseance. Pesey a pidi’e pa ta trahando hunto, pa seis luna. E meneer aki a manda un kort geding pa un faillissement.
La Linda ta pidi pa retira e bewindvoerder y pone otro hende. Nan kier mira un La Linda bek di nobo, florece manera antes. Asina aki pueblo tambe por disfruta di loke La Linda tin.
La Linda a habri pasobra tin placa pa habri bek, pero no suficiente pa paga tur trahado, manera cu nan tabata desea. Kier a haci un inkrimping pa wak cua trahado kier keda y cua kier bay. Ora cu nan a bisa cu nan ta bay cera La Linda pa wak kico labor ta bay bisa, nan a dicidi di bay papia cu un abogado. E abogado a papia full un storia cu no ta cuadra, segun e representante. E trahadonan aki nan cabes a wordo bruha. Ora cu no sa di ley, ta busca modo pa trapa nan tur caminda. Tur hende sa cu abogadonan ta hopi bibo riba nan tereno. Mester busca ley, mester busca derecho, un second opinion prome cu actua.
Plannan ta pa sigui cu La Linda. Si acaso nan duna cu La Linda no ta bati bancarota, ta keda den man di Huez Comisario De Leur. E mester sa cu e bewindvoerder cu el a manda, no ta traha cu e director. E hues comisario sa bon cla kico ley ta bisa, den articulo 218. E sa kico ta pasando y e sa cu a manda un carta p’e. E sa tambe cu bewindvoerder a manda un carta pe tambe, pa bisa pa cera La Linda totalmente, lag’e bay failliet. No ta asina asina ta bati bancarota, pasobra e kier. E no ta un curator.
E ta bin exigi cera tur porta. E piso abao y prome piso ta wordo gehuur door di La Linda NV. E no ta un propiedad di la Linda NV. E meneer aki a cera full e negoshi y e sa cu si e no habri e porta awor aki, La Linda NV ta bay lanta un caso contra dje, pasobra di tres y di cuater piso, nan no por bin traha pasobra ta habri 8’or di mainta pa 4’or di atardi. Tin cu kier bin traha anochi y nan no por haci nada eyriba.
Pueblo di Aruba ta cordialmente invita pa bin La Linda, pasobra e baratiyo ta sigui. Ta for di diamars te cu diasabra. Dialuna ta cera. Ta bay mira kico e di dos paso lo bay ta. E ta bay keda un biaha mas den man di hues comisario. Ta e ta esun cu ta bay tuma e decision. Si e kier laga Aruba su economia bay atras, pasobra e ora un luga ta cera atrobe.
Ta mira cu hopi luga ta cerando y no ta mira ningun beneficio pa nos Aruba.
