Den un epoca cu e corantnan no tin suficiente espacio pa raporta e ladronicia, atraco, kiebro cu robo y otro bagamunderianan cu ta sosode riba nos Isla, mi ta contento di comparti e storia bunita aki di decencia y honrades y mi ta pidi tur cu lesa esaki pa comparti’e cu boso amigonan.
Dialuna mainta mi a bishita e ATM di CMB na stadion Guillermo Prospero Trinidad y purba saca algun florin. Despues cu m’a haci tur loke e machine tabata manda mi haci, e placa no a sali. M’a warda y warda, pero nada. Pa colmo awacero a cuminsa fingi mientra cu e solo tabata cay riba e aparato. For di den mi auto mi no por a mira si tabata tin algun mensahe. Mi a conclui cu e machine no tabata funciona bon y mi a laga e lugar pa e siguiente cliente. Pero mes ora mi a corda cu algun tempo pasa un ATM, tambe di CMB, pero na un otro sitio, a traga e placa pasobra mi no a gar’e mes ora. Mi a dicidi di dal un rond y bolbe pa e ATM, pero cu idea di sali for di e auto pa mi por mira miho. Si mi pidi mi balans mi lo sa si e transaccion a tuma luga y e ATM a bolbe traga mi placa.
N’e momento cu mi a yega bek y para mi auto den fila pa mi warda mi turno, un dama cu ami no tabata conoce a bati na mi bentana di auto. “Sr. Harms”, el a bisa mi “bo a laga esaki den e ATM awor ey”. Cu “esaki” Gerdie Koolman tabata kier men 10 papel di shen florin.
Gerdie Koolman tabata e cliente cu a uza e ATM despues cu ami a uz’e. Ora cu el a mira e biyechinan ta colga di e ATM el a gara nan y sigui mi te ora cu el a haya e chens di entrega e placa n’ami. Esaki ta un acto di decencia y honrades cu mester haya tur publicidad posibel. Gerdie no kier a tende di un recompensa. Please contacta mi, Gerdie, pasobra mi kier por lo menos regala bo copia di mi bukinan.
Gerdie Koolman, bo a mustra cu honrades na Aruba no ta morto.
Sin cu ami a bis’e ta na cua ATM e incidente a tuma luga, un amigo a remarca: “Sigur esaki a sosode cu e ATM na stadion! E machine ey tin masha mal reputacion di ta sumamente slow pa saca e placa.” Mi ta suplica CMB laga revisa e aparato pa determina pakico e ta asina slow. Tambe mi ta suplica CMB laga pone un afdak pa protega e ATM y e clientenan di awacero.
