Relaciona cu tratamento di e caso Avestruz den Corte, ayera y awe a atende dos compania liga na Leoncita Arends, di cual Ministerio Publico ta acus’e di a haya trato preferencial for di Minister Benny Sevinger. Un di e motibonan di e caso, ta mara na un declaracion cu Ofelia Beide a duna y e otro declaracion di Luisenne Roja, miho conoci como “Gen”. E prome a bisa recherche cu e no ta papia pero pa nan interoga Gen Roja pasobra e sa mas. Y e ultimo aki, su declaracion na recherche, a causa harimento den sala di corte awe.
Gen Roja, cu den fin di siman a celebra su 40 aña di bida den grandi, ta un testigo den caso Avestruz. Locual a hala atencion den su interogacion ta cu tur cos a cuminsa cu un “hint” di Ofelia Beide. E ultimo a nenga di duna ningun declaracion na autoridad, pero si a “yuda” husticia cu algun nomber di hende cu lo sa mas di e caso. Un di nan ta Luisenne Roja. Remarcabel den esaki ta cu Beide a bisa e recherchenan pa bay cerca Roja pasobra e ta rabia cu Leoncita. Segun Ofelia, cu Leoncita a keda debe Gen placa y cu e lo ta rabia. Pues, di inicio di e caso caba hustica tabata sa cu e supuesto testigo aki no ta neutral.
Durante tratamento di e caso den sala di corte awe, a repasa henter e “dossier” y hues a haya oportunidad amplio pa haci pregunta na fiscal, na e abogadonan defensor y na e sospechosonan mes envolvi. E unico sospechoso den e caso aki, cu ta insisti cu Benny Sevinger a haya placa bou man, ta Gen Roja. El a bisa recherche cu Leoncita a dun’e un envelop cu 200 mil florin pa e hiba pa Benny Sevinger na su cas. E ex-minister ta insisti cu e no sa ken ta Gen Roja y cu nunca el a mir’e den su bida, pio haya cen for di dje.
Gen Roja a bisa recherche cu el a bay cas di Benny Sevinger na Paradijswijk y cu eynan el a entrega 200 mil florin. Ora cu polis a puntr’e si el a mira Benny Sevinger na e cas, el a contesta cu no. Cu el a laga e envelop eynan cerca un señora cu por ta e cria na e cas of kisas casa di e minister. E mes no conoce e casa pues no sa si esun cu a tuma e envelop ta casa of ayudante den cas. Sevinger a bisa polis cu e no tin ayudante domestico, pues e unico persona cu a resta ta su señora y e no a haya nada di niun Gen Roja.
E ora a bay over na cuestiona Roja riba e circunstancianan e dia ey ora cu e supuestamente el a bay entrega placa pa Leoncita na cas di Benny Sevinger. E testigo Roja a splica polisnan na Landsrecherche cu e envelop tabata djis un tiki mas grandi cu un biyete di Aruba. Pues ta e tipo di envelopnan bruin chikito cu tabata paga salario den nan antes. El a bisa recherche cu eyden tabatin 200 mil florin y cu e ta sigur di esey. Ora nan a puntr’e con e por sa sigur, cu si el a conta e placa prome, el a contesta cu no, cu el a hole cu tabatin placa eyden.
Abogadonan den sala di corte a haya esaki un hilaridad, pasobra Gen Roja obviamente tin un solo intencion, purba destrui Leoncita Arends, pa kende e tabata traha den pasado. Den su declaracion e nunca a mira e minister, e no ta corda precies ken el a duna e supuesto envelop, pero e sa si cu den e envelop chikito cu tabatin un gordura di 7 centimeter, supuestamente tabatin 200 mil florin aden. Y pio ainda cu el a bisa cu el a hole cu tin placa y cu via holo e tabata sa cuanto placa tabatin supuestamente den e envelop tambe.
E tipo di declaracionnan asina na polis, ta bay den dossier di un caso y ta yega te na hues den corte. Mester tene cuenta cu si ta hunga politica cu tipo di asuntonan serio asina, cu despues di e caso, cu chens ta grandi cu ta entama caso di “valse aangifte” pa duna declaracionnan tendencioso asina, siendo cu sa cu no ta berdad locual a bisa polis. Ta ken por hole placa y sa precies cuanto placa lo tin den un envelop? Aunke e declaracion a causa hilaridad den corte, e ta mustra si e calidad di redashi riba cual ta investigando aki. Un di e casonan mas grandi di ultimo añanan, pero cu durante su tratamento ta topa cu varios buraco cu lo por stroba e chensnan di fiscal na final pa logra un condena of e condena desea.
