Diamars mainta tabatin den Corte di Prome Instancia tratamento di caso Avestruz. Esaki ta un parti di e proceso caminda, despues di a haya e dossier completo, hues, ministerio publico y abogado tin oportunidad di haci pregunta pa aclaria duda cu por tin di su contenido. E sesion awe tabata enfoca riba e sospechoso involucra den otorgamento di tereno na e compania Elinath, esta Leoncita Arends, Rebeca Richardson, Benny Sevinger, Franklin Abath y Freddy Every y tabatin un duracion di casi tres ora.
Di comienso caba e contrapartidonan den e caso tabata riba nan tenchi pa e procedura cana manera regla ta bisa. Den un contesta Arends a splica cu el a pidi su yiu pa bira director di compania pa e siña haci negoshi cu ayudo di profesionalnan. Richardson a confirma esey y cu e no a wak nada malo den esey; cu e tabata sa cu e proyecto lo ta di un compleho di apartamento luhoso y local pa negoshi. Continuando cu pregunta na Richardson, un di e fiscalnan a hala atencion di su abogado, mr. Arendsz-Marchena pa no bisa su cliente kico pa contesta, algo cu e abogado a nenga rotundamente di ta haci.
Mas aleu, Hues a pidi sospechoso Arends pa no wak su declaracion imprimi pa e contesta pregunta. E idea ta pa e sospechoso contesta pregunta directamente. Arends a expresa di no ta compronde pakico e no por haci esey y a opta na varios ocasion pa no contesta of referi na su declaracion haci na Landsrecherche. Tabatin pregunta rond di un acuerdo di Finder’s Fee cu un tal Bareño a prepara pa benta di tereno, pero cu no tin firma; pa cual Arends a bisa cu no tin firma, paso e no a bay door.
Na final di e sesion, abogado di Richardson a indica cu tur cos a bay bon y su cliente a sa di contesta pregunta cu el a haya mas bon cu e tabata por teniendo na cuenta cu ta riba sucedidonan di casi dies aña pasa.
