E ganado di Gang di Arte 2022, esta No Image Dance Crew, ta biaha awe den diferente vuelo pa Boneiro. Meta di esaki ta pa nan tene un intercambio cu e hobennan di Boneiro y Corsou den arte.
Julie Merencia a splica na nos redaccion cu nan ta biaha awe pero lo regresa dialuna. Durante e bishita aki na Boneiro, e hobennan lo tin momento pa comparti cu otro y haci intercambio. E competencia di Gang di Arte di Boneiro mes ta tuma luga diasabra. Diasabra mes, e hobennan di tur tres isla lo tene intercambio pero tambe hunto nan mester traha un show pa asina presenta e mesun anochi. E competencia ta tuma luga na Tera Cora Ranch, Merencia a indica.
Den pasado ya caba tabata tene competencia di Gang di Arte entre e Islanan Hulandes y Hulanda. Pero, na momento cu a bin e separacion na 10-10-10 a stop cu ne. Merencia a sigui splica cu asina mes Boneiro y Corsou si a continua tene esaki. Pa awo no tin competencia di arte entre e islanan, pero ta mirando si lo tene esaki bek. Pa awo ta cuminsa tene intercambio den Gang di Arte entre Aruba, Boneiro y Corsou. Aña pasa un grupo di Boneiro tabata presente n’e competencia di Gang di Arte pa presencia e evento. Nan a haya e oportunidad pa tene un show. Pero mas importante tabata cu nan a haya e oportunidad di tene intercambio cu e hobennan di Aruba.
