Su Amor pa Aruba. Francisco a nace na Aruba, di un famia cu a bin di Dominica. E tawata hopi contento cu el a nace na Aruba.
Franscisco tawata sa e diferencia si e mester a nace na Dominica, pasobra el a bay biba na Dominica ora e tawatin 4 aña y a keda te cu su 7 aña. E tawata sa bon bon kiko Aruba a nifica p’e y pa su famia. Aruba a haci un diferencia den henter su bida y p’esey Francisco tawata super agradecido na Aruba. E sentimento aki nunca no a kita y e tawata sintie constantemente. Francisco no tawata por ora hende ta papia malo di Aruba. Francisco tawata yama su mes un nacionalista of patriotico. Francisco a haci bon uso di e oportunidadnan cu
Aruba a brindele.
Su escogencia di profesion tawata pa Aruba. Pa e stimacion cu e tawatin pa Aruba, el a scoge pa un profesion cu e tambe por duna algo bek na Aruba. Prome Francisco a studia enfermeria na Hulanda y despues a bay studia na aña 1963 pa trahado social na Sociale Academie voor Mannen, in Eindhoven. Eynan el a studia ‘maatschappelijk werk in justitieel verband’ cu awendia ta yama ‘Juridisch Maatschappelijk Werker’.
Na e Sociale Academie unda e tawata studia, e tawatin amigonan cu tawata studia ‘Cultureel Werk’ y e tawata sa cu Aruba mester di ‘cultureel werkers’. Den su di cuarto aña di estudio, e Academia a bin cu e estudio di Opbouwwerker y el a dicidi cu su scriptie ta bira Opbouwwerk, pa cual el a haya un 9 p’e. Francisco ta un di e promenan cu a haci Opbouwwerk na Sociale Academie. Francisco a scoge e estudio ey, pasobra el a bisa: “Esey mi ta haci pa Aruba”.
A cuminsa traha na Aruba
Ora cu el a caba di studia, el a a cuminsa traha na Voogdijraad pa 5 aña. Francisco tawata bisa cu Voogdijraad tawata su ‘werkplek’, pero 1 aña despues, ora colega Lucia Kelly a bin traha na Voogdijraad, nan bista tawata hopi riba Opbouwwerk. Y den nan tempo liber nan tawata dedica nan mes na trabou di bario y trabou di Centronan di Bario na Aruba.
A haya studieopdracht pa ‘Voortgezette Opleiding Opbouwwerk’
Despues di algun aña trahando, Francisco a haya un studieopdracht pa bay studia durante 2 aña e ‘Voortgezette Opleiding Opbouwwerk’ na Hulanda. Na Hulanda nan a pidie pa duna les di maatschappijleer y cu hopi placer el a hacie. Y ora el a bolbe bek Aruba, despues di a termina su studieopdracht V.O. Opbouwwerk, nan a pidie pa drenta den enseñansa, como ”leerlingenbegeleider”, esta pa guia studiantenan. Como guiado di studiante Francisco a traha di aña 1975 pa aña 1984 (9 aña), mescos cu un trahado social. E trabou tawata ensera duna guia na alumnonan, famianan, unda e tawata mira tur e problemanan. A resulta cu hopi mucha ta bin scol, pero tin asina tanto problema social cerca e mayornan, den famianan y ta tin spijbelmente etc.
Semper como boluntario a traha como opbouwwerker
Nunca Francisco a traha oficialmente den opbouwwerk na Aruba. Inoficialmente, pues semper como boluntario, Franscisco a traha den opbouwwerk. Scol ta caba y pa 2’or ya e tawata na OSTICEBA – Organisacion pa Stimula Centronan di Bario na Aruba. Na OSTICEBA Francisco tawata pa hopi aña miembro di Directiva di Fundacion Osticeba.
Den DeTrupialen a haya e educacion social cultural
Franciso tawata den De Trupialen y Frère Alexius tawata su ‘guru’ (su guia) den tempo di school. Aki Francisco a haya realmente e educacion social cultural. E tawata biba den Dakota y no tawata esunnan mas rico den e grupo di De Trupialen. De Trupialen ta siña bo musica, hunga comedia, tawata manera actividadnan despues di oranan di scol cu disciplina constantemente. Y despues Francisco a drenta Asociacion Coral Ars Nova Aruba como corista.
Como Trahado social bo tin bo vocacion
Francisco tawata bisa: “Como trahado social bo ta bin cu bo vocacion pa yuda, cu bo compasion y solidaridad, bo ta pensa, laga mi yuda e hende, saliendo di amor pa bo prohimo”. Francisco a haci trabou boluntario na Imeldahof, Famia Planea, Fundacion OSTICEBA , Muziekschool, Grupo hubenil cultural De Trupialen, den comision Communiteit Nederlandse Antillen, Key Club, preparacion di matrimonio pa 10 aña largo, dos weekend pa luna tin cu duna preparacion di matrimonio pa misa Catolico.Tur esaki banda di su trabou profesional diario. Tawata den sindicato y den politica. Tambe Francisco a duna diferente trahadonan social ‘supervisie’ of ‘werkbegeleiding’ cu hopi trahadonan social tawata encanta, pasobra Franscisco tawata laga bo pensa mas profundo y bo tawata pasa pret cu ne.
Franscisco tawata enamora di su profesion Trabou Social
Francisco tawata contento cu el a studia e profesion trabou social. Francisco tawata expresa: “ Mi ta enamora di mi trabou, pasobra e trabou a forma mi, el a siña mi, el a duna mi hopi bista di mi mes como hende. Tur mi fayonan, tur mi bon parti, tur mi cosnan, esey mi a haya den y di mi estudio. E estudio, e profesion a pone’mi profundisa den humanidad. Ta parce cu el a cuminsa y cu nunca ta bay stop tampoco. Lo e stop den mi caha di morto”. Francisco a stima su profesion masha hopi mes, e no por yuda cu e ta stim’e asina hopi. E profesion a emancipa su persona tambe, ta mas asertivo, pero tin ora e ta haci su persona hopi moli tambe. Si e pensa riba e tres aspectonan: conocemento, afeccion y habilidadnan, e balans ta bay mas riba afeccion. Francisco a ripara den e trabou social, cu si bo no ta stima hende, bo no ta stima bo mes, bo no lo logra nada. Bo por tin tur cos di siña, bo por tin tur e conocemente, pero si bo no tin e amor, bo no ta nada. E tawata bisa semper: “Mi no tin nada, mi mes no ta nada, esey ta mi emancipacion. Esey t’ami y asina mi kier biba”. Esey tawata Francisco su motor.
Traspaso di su vision na studiantenan: e CALOR cu mester tin
Francisco a pasa su vision na studiantenan y tawata contento cu e contribucion cu e por a duna. E tawata predica: “Pa tin mas afeccion, cu e studiantenan por tin tur e cosnan di e bukinan ey, pero pa no bira un ‘techneut’, pa semper corda riba e CALOR cu mester tin pa por duna calor. Esaki ta e diferencia cu nos como trahado social tin cu haci”.
Trabao di un Trahado Social ta pa FORMA un hende pa ta mas
Pa Francisco e clientenan nan ‘self esteem’ tawata un cos masha importante. Siñanan stima nan mes, siña e cliente stima su mes. Ken bo ta of kiko bo ta? Trabou di un trahado social ta pa forma un hende pa stima su mes.
E importancia di un TATA den e Educacion di su Yiunan
Francisco no tawata stop nunca di bisa con importante un tata ta den e educacion di su yiunan. 90% di su clientenan no tawatin un tata den nan educacion, anto mira kiko ta tur e consecuencianan di no t’ey como tata. Tatanan tin un tarea importante pa cu e educacion di nan yiunan. Tur momento y tur caminda cu Francisco haya e oportunidad, e tawata bisa esaki y laga nan mira e consecuencianan cu cifra pa mustra con importante un tata ta den e educacion di su yiunan. Francisco tawata goza ora e mira un tata cu su yiunan, yiu homber y yiu muher, cu e tata ta pusha e ‘kinderwagen’, ta hiba e yiu scol, ta hiba e yiu WGK, ta landa cu su yiunan, ta amigo di e yiunan.
Trabou Social lo sigui Desaroya
Francisco tawata haya cu tin hopi desaroyo den e trabou social compara cu su tempo. Y e desaroyonan aki lo no stop. Francisco tawata gusta siña y tawata puntra su mes den cua direccion nos ta bay cu e trabou social? E genetica ta hunga un rol grandi den nos trabou. Tur pa comprende e ser humano mas y mas mihor. Tin un reto ainda cu ta: “Pa hende por mira cu trabou social no ta duna regalo, pero cu e ta un trabou educativo. Pa hende por comprende cu trabou social ta un trabou emancipatorio. Hende no mester mira e trabou social como un trabou di limosnero. Trabou social ta un movecion pa e hendenan yega pa yuda nan mes, ‘zelfredzaamheid’, cu ta pa emancipanan, emancipa e PUEBLO. Francisco tawata un di e miembronan hunto cu Lucia Kelly, Yvonne Spellen y Glenda Gil di Comision pa Investigacion Historia di Trabou Social na Aruba – C.I.H.T.S.A. cu despues a bira Fundacion Trabou Social na Aruba – F.T.S.A. Francisco, Frans, Cha Tiger (el a yega di actua como Cha Tiger), nos como bo coleganan a aprecia bo, a siña hopi di bo, a pasa bon y pret cu bo, a stima bo y lo haya bo falta sigur cu si.
Masha danki pa bo stimacion pa Aruba, stimacion pa hende y pa bo profesion trabou social. Aruba ta orguyoso di bo Fransisco.
Poesia:
Francisco, un pionero berdadero un profesional y boluntario cu positivismo sin igual
Referiendo aki na un cantidad di iniciativanan riba p.e. tereno di trabao social, enseñansa
Algun ehempel: pone prome piedra pa trabao comunitario den bario, pa trabao social na scol
Nunca tawata falta e energia y pasion pa su tarea, pa empodera esun marginal, den probresa
Chaskero, sigur un aspecto cu ta caracterisa Francisco den su trabao , den contacto cu hende
Incansabel su deseo pa sigui desaroya competencianan pa aporta na bienestar di e ser humano
Su aporte valioso, su dedicacion na problema di adiccion na Aruba tanto pa cliente y e area
Compasion, solidarismo semper formando parti di su motivacion intrinsico pa e trabao
Orguyoso di ta un Arubiano y agradecido pa tur e oportunidadnan cu Aruba a brindele
Como mentor y supervisor a contribui grandemente na formacion di hopi trahadonan social
Enseñansa, otro area di trabao unda como maestro y guiado di studiante a cumpli cabalmente
Lealtad na su clientenan, e bario y e comunidad Arubano un punto di salida semper presente
Aporta como boluntario na e necesidadnan reinante den comunidad ta algo normal te na final
Integrante di De Trupialen y Coro ta muestra di talento tambe riba tereno musical
Respet tin sigur pa e cantidad y calidad di trabao cu Celaire a desplega, a toca curason di hopi
E abundancia di bon ehempel cu ta laga atras un fuente di inspiracion pa cada un di nos
