Fundacion Lanta Papiamento ta un fundacion boluntario. E meta principal ta pa promove Papiamento, wak pa Papiamento haya su luga den comunidad manera debe ser.
Segun Joyce Perreira, a organisa hopi actividad den aña pa conscientisa hende di e balor di Papiamento.
Y esaki ta un di nan, esta e Tertulia di 100 aña di Lio Booi (dfm) y Luis Daal (dfm) cu a tuma luga diasabra ultimo den Biblioteca Nacional.
Ta clausura e aña aki cu un fiesta caminda ta celebra nos Papiamento. Ta celebra nos literatura na Papiamento y ta haci’e cu algo masha special.
Tin dos autor hopi grandi cu tin den Antias y Aruba. Un ta Luis Daal di Corsou y e otro ta Lio Booi di Aruba/Boneiro. Nan tur dos lo a cumpli 100 aña e aña aki si nan tabata na bida.
Ta pa e motibo aki mes ta honra nan e aña cu dedica un seccion di e programa na cada un di nan. E di tres seccion ta honra e autornan cu a publica un buki e aña aki. Ta un programa masha interesante cu declamacion, charla, baile, musica y ta honra tur e participantenan di e programa y tur e autornan cu un certificado na final.
Celebracion di Papiamento
E celebracion aki ta tur aña. A cuminsa cu e celebracion aña pasa, mirando cu tabata aña di Papiamento y a dicidi cu tur fin di aña ta honra esnan cu a contribui na Papiamento.
A pensa cu e hendenan cu a dedica nan tempo liber, skirbi un buki, buki pa Mucha pa adulto. Sea un storia of un buki cientifico, loke sea, tin cu honra nan pasobra nan a haci un trabao hopi grandi cu ta na fabor di nos muchanan, nos cultura, nos hendenan, etc.
Muchanan ta fia
Biblioteca tin tur e bukinan y tin hopi mucha ta fia e bukinan aki. E fundacion kier promove compra di buki na Papiamento. Hopi biaha ta bisa cu nos hendenan no gusta lesa. Si un mucha mester lesa un buki cu e no ta compronde, e tin cu haci hopi esfuerso pa les’e, esey ta fastioso.
E no ta coy un buki facil pa lesa. Pero si e buki ta na Papiamento, na momento cu e les’e, e ta compronde. Y e bukinan ta asina interesante.
Tabata tin 10 mucha cu a honra, pasobra cada un a skirbi un storia, cu Bon Nochi Drumi Dushi a pone den un buki. Hasta mucha por skirbi buki. Esey tambe ta celebra y a pone nan den full atencion.
Ainda e bukinan aki ta online si. Pa pone online ta hopi trabao. No tin nada mas dushi pa tene un buki den bo man. Biblioteca ta masha barata. E no ta ni 5 florin pa aña. E muchanan por fia buki, hende grandi tambe por fia buki y trece nan bek.
Biblioteca ta un espacio cultural masha importante den un pais. P’esey Lanta Papiamento tin hopi contacto cu Biblioteca Nacional. Biblioteca Nacional ta coopera cu tur actividad di e fundacion. P’esey e evento aki ta uno organisa pa Fundacion Lanta Papiamento hunto cu Biblioteca Nacional.
Durante e evento tabata tin bailamento, tabata tin charla tambe, declamacion, contamento di storia, y musica naturalmente na final bao di animacion di Un Brindis, caminda cu tur hende por balia.
