Un caso lamentabel a sosode na Baby Beach caminda cu un turista a bira malo den lama y despues di poco rato a sak den otro y a fayece.
Segun vocero di polis, Liliana Rasmijn, pa 4’or y 40, Central a notifica di e hecho aki. Patruya a yega na e sitio y a bin haya personanan ta yudando e turista, masculino, dunando CPR.
Ambulance tambe ta yega na e sitio unda cu nan a tuma over, pero lamentablemente no por a haci nada mas pa e meneer aki.
Ta trata di turista AA, for di Colombia, pasando su dianan na Aruba y tabata tin 67 aña. Dokter a constata morto pa 6’or y 40. Slachtofferhulp tambe tey presente pa guia e famia den e momentonan aki y asina bay hunto cu e auto di funeraria pa haci tur areglo necesario.
Segun Rasmijn, e famia lo dicidi kico ta bay pasa. Door cu ta asina recien, ta pasa e periodo di shock y pa despues cuminsa cu e tramite.
Loke cu kier a clarifica ta, cu e persona no a hoga, mirando e investigacion ta mustra cu e persona a bira malo den lama y saliendo for di lama, el a sak den otro.
Dokter a constata morto cu aparentemente lo mester ta un atake. Pues e no a hoga. El a bira malo den lama y for di eynan a purba di yud’e. Pero lamentablemente no por a haci nada mas.
E cabayero aki tabata hunto cu su casa y su ruman muhe y tabata celebrando su cumpleaños ayera.
Cuerpo Policial ta manda palabra di profundo condolencia na famianan di e fayecido. Awo ta Slachtoferhulp lo guia e famia pa wak kico ta tur e pasonan. Nan ta turista y no sa kico tur mester pasa awor aki. Nan lo percura, hunto cu funeraria pa fix tur cos pa asina nan hiba nan ser keri bek na nan pais.
