Aunke tur hende nan deseo ta pa e refineria habri su portanan bek, e no por keda sin bisa cu tin cierto incertidumbre pa cu esaki. Esey tabata palabranan di Hubert Dirksz, Presidente di sindicato FTA, cual organisacion recientemente tabatin un reunion cu Gobierno di Aruba.
E refineria ta hopi importante pa Aruba y Gobierno su pensamento ta cu mester cumpli cu e compromiso. Pero mester tin un re-orientacion. Pa yega na e reapertura, mester tin un recapacitacion pa mira si e continuacion ta viabel y manera tur hende ta spera. Tin incertidumbre grandi, mientras cu trahado- y companianan local ta en espera pa haya trabou den e refineria. Pero e pronosticonan ta mustra mas negativo cu positivo.
Di parti Gobierno a haya e impresion cu nan kier sigui diversifica e economia, y no laga tur cos cay solamente riba turismo. Pero pa logra esaki mester tin palabranan cla pa cual no por warda mucho tempo pa keda den incertidumbre pa na final haya e mal noticia. Pesey e ta na fabor pa sigui busca informacion kico ta bay pasa.
No solamente cerca sindicato pero den Gobierno tambe tin incertidumbre. Loke no sa si e intencion di Gobierno ta pa cera e capitulo aki of haci algun esfuerso toch. Na final di e reunion por a compronde di e Minister cu si e proyecto no sigui, lo mester busca otro alternativa.
