Den un publicacion riba nan pagina di Facebook, Sindicato FTA a dirigi na su miembronan, riba e tantisimo preguntanan cu nan ta haya encuanto nan derechonan na pia di trabao, relaciona cu e menasa inminente di COVID-19, popularmente conoci como Coronavirus.
Actualmente Aruba no tin ningun caso registra (ainda) di e virus aki, pero teniendo na cuenta e hecho cu nos ta biba di turismo, ta mas bien un cuestion di tempo cu un of mas di nos bishitantenan cu ta bin for di paisnan cu si ta afecta caba pa e virus aki, lo trece nos den contacto cun’e.
Esaki logicamente ta trece preocupacion bou di nos clase trahador, specialmente esunnan cu ta traha den sector HORECA, kendenan ta esunnan cu mas hopi tin contacto cu nos huespednan cu ta bin di afo.
Con leu dunadonan di trabao den e sector aki (hotel, casino, restaurantnan, etc.) ta obliga di tuma pasonan pa evita y limita e posibel traspaso di e virus na empleadonan?
Articulo 1614x inciso 1 di nos Codigo Civil ta stipula: “E dunado di trabao tin e obligacion di (entre otro) tuma e medidanan necesario pa evita cu e trahado ricibi daño como consecuencia di eherce su trabao.” Inciso 5 di e mesun articulo aki ta amplia e obligacion aki stipulando cu e dunado di trabao ta responsabel tambe pa otro personanan cu e ta laga haci trabao p’e sin cu e tin un acuerdo laboral directamente cu nan (pensa por ehempel riba contractors of uitzendkrachten).
A base di lo antes menciona tur dunado di trabao, specialmente esnan den sectornan unda e peliger di exposicion na e virus ta mas halto, tin e obligacion legal di tuma tur medida necesario pa evita cu nan empleadonan ta exponi na Coronavirus.
Kico asina nos por compronde bou di esaki?
Esaki kiermeen cu e dunado di trabao entre otro mester inventarisa e risiconan pa cu e virus aki na su empresa y evalua esakinan. Aki por pensa riba preguntanan manera: con grandi e probabilidad ta pa exposicion na e virus, cua trahadonan ta core mas peliger y cual ta e posibel consecuencianan. Siguientemente mester pensa riba e medidanan cu tin cu tuma pa evita of minimalisa e risiconan aki.
En general por pensa riba medidanan manera:
- Tene sesionnan informativo cu e empleadonan den cual ta instrui nan riba con pa evita y minimalisa posibel contagio cu e virus aki;
- Pone materialnan disponibel na pia di trabao, specialmente den areanan di riesgo halto, cu ta mitiga contagio manera ‘hand sanitizers’, habon antibacterial, etc.;
- Duna acceso y oportunidad na empleadonan pa nan laba nan mannan regularmente durante ora di trabao;
- Limpia y desinfecta areanan publico na e empresa regularmente;
- Ademas ta importante pa duna espacio na empleadonan cu presenta sintomanan, pa no presenta na pia di trabao pendiente exclusion di contagio.
Como representante di empleadonan FTA ta haya cu ta di suma importancia pa empresanan tuma medidanan di prevencion di contagio cu e virus aki hopi na serio. Legal y moralmente tur dunado di trabao tin e obligacion pa proteha tanto e trahado como tambe e pueblo di Aruba en general.
