Siman pasa partido MEP a anuncia, durante un congreso di partido, cu Aruba ta stabile y cu campaña a cuminsa oficialmente. Un movecion cu a tuma hasta nan partner den coalicion di sorpresa.
Pa loke ta trata e partner di coalicion den Gobierno, no ta keda nan nada otro si sigui guli nan integridad den parlamento pa wanta e Gobierno. Segun lider di fraccion di Accion21, Miguel Mansur, despues di eleccion 2021, RAIZ tabata tin un oportunidad unico despues di eleccion 2021, pa cambia e sistema. Si el a sinta cu Marisol Lopez-Tromp of cu su persona, tabata tin un oportunidad pa cambia e sistema.
Pero loke por wak ta un sed di poder, segun lider di Fraccion di Accion21, Miguel Mansur. Tur hende por ripara cu Aruba ta tur cos, menos stabiel. Tanto MEP como RAIZ a bay di acuerdo cu esaki.
Durante un reunion den Parlamento, Prome Minister, mr. Evelyn Wever-Croes a bisa cu den Gobierno di Aruba, no ta practica Friends & Family. Den e ocasion aki, Parlamentario Raymond Kamperveen, di e partido cu ta sostene coalicion, RAIZ, casi ta cay for di su stoel. Pa Mansur esaki tabata un momento ideal p’e la actua y para ariba cu esaki no ta berdad, pero e no a hacie y a laga e momento pasa. Mescos cu el a haci ora cu e no a lanta para y actua contra di e mocion di desconfiansa contra di e deal di Eagle LNG, unda cu Misha Raymond y Raymond Kamperveen a vota contra di e mocion di desaprobacion.
Tambe tin e situacion di Respaldo, unda cu a priminti placa, pero esaki no a keda concretisa. E pais ta bayendo den mal direccion, tin corupcion structural y unda cu esunnan cu tin cu control Gobierno, ta bezig ta ‘fix’ nan mes.
Mas aleu, Mansur a bisa cu na september 2023, ta dos aña di gobernacion. Despues di dos aña, no por tumba Gobierno mas. Dus, RAIZ tin di awo te cu september pa baha Gobierno.
Por ultimo, Miguel Mansur,lider di Fraccion di Accion21 den parlamento a bisa cu e Gobierno aki ta uno gañado. Pa gaña cu cos ta stabiel, nan ta bay tira stof den wow’i pueblo, pero e Gobierno aki ta tur cos, menos stabiel.
