Manera ta custumber pa hopi aña caba, e club di natacion Aruba Dolphins Swimming ta organisa su competencia internacional yama Aruba Dolphins Invitational.
E aña aki nan ta celebrando nan di 20 aniversario organisando e competencia. Un cantidad di no menos cu 312 atleta di 9 diferente ekipo representando 4 pais lo bataya durante fin di siman aki na Piscina Olimpico Roly Bisslik pa mira ken lo bira campeon di e 20th Aruba Dolphins Invitational.
Preparacion di e landadornan a cuminsa for di comienso di e aña escolar y expectativanan ta halto.
E ekiponan di exterior cu lo ta presente ta B-Train Swimming di Canada, Typhoon Swimming Team di Corsou, Sithoc Swim Club di Corsou, Orca Swim Club di Corsou y Delfins Swimming Club di Boneiro.
Giants Aquatics, Stingray Swimming y Aruba Dolphins t’e ekiponan cu lo representa Aruba.
Diabierna atardi, e warm up a cuminsa pa despues sigui cu e apertura y desfile y pa 6:30 pm, e competencia a cuminsa den diferente categoria, cual ta 100M Back, 50M Freestyle, 400M IM y 200M Medley Relay.
Diasabra 5 november 2022 parti mainta warm-up lo cuminsa pa 7:30 am y careda lo cuminmsa pa 8:30 am E eventonan cu lo landa e mainta aki ta 400M Freestyle, 50M Butterfly, 100M Backstroke, 200M Breaststroke, 100M Freestyle y 200M Mixed Free Relay.
Diasabra 5 november 2022 parti atardi warm-up lo start 4:30 pm y careda lo inicia pa 5:30 pm E evento nan cu lo landa e atardi aki ta 50M Backstroke, 200M Freestyle, 200M I.M, 100 Breaststroke, 200M Mixed Medley Relay.
Diadomingo 6 november 2022 warm-up lo start pa 8:30 am y careda lo cuminsa pa 9:30 am. E eventonan p’e dia aki ta 200M I.M, 200M Backstroke, 50M Breastroke, 100M Butterfly y 200M Free Relay.
Entregamento di premio lo tuma luga diadomingo merdia despues di e competencianan n’e piscina mes.
Un danki ta bay na tur sponsor pa por haci e competencia aki uno posibel: Tri-Bike Aruba, MetaCorp, Setar NV, Refineria di Aruba, Banco di Caribe, Aeropuerto Internacional Reina Beatrix, SWIFT distribution cu su producto nan di Cerave y Surface, Divino Aruba, QF Global Network y Giannis Group.
Directiva di Aruba Dolphins Swimming And Waterpolo Club ta invita pueblo di Aruba pa bin presencia e competencianan di natacion aki cu ta priminti di bira uno sumamente interesante.
