Recientemente cabesantenan y lidernan di diferente Centro di Mucha a participa na e workshop, “Comunicacion den Centro di Cuido di Mucha”. Bon comunicacion ta forma e base den tur relacion entre hende, pa e motibo aki, durante e workshop cursistanan a haya diferente informacion cu ta regarda comunicacion entre colega, comunicacion cu mayornan y e muchanan. Tambe a fiha riba e lider mes como persona y e influencia cu e forma cu ela a wordo lanta como mucha tin riba su forma di comunica como adulto. E parti aki tabata un “eye opener” pa e cursistanan y alabes nan a ricibi tools con pa mehora e forma di comunica. Na final di e workshop, a haci un “rollenspel” unda cursistanan mester a actua den diferente scenarionan di situacionnan real cu sa sosode den nan trabou. Durante e parti aki e cursista a practica e metodonan cu el a siña durante e curso pa resolve un situacion. FPNM ta gradici drs. Swinda Dumfries, Orthopedagoog di Jeugdgezondheidszorg cu a fungi como orador durante e workshop den cual el a comparti diferente informacion y “tools” cual nan por usa den nan trabou diario cu mucha y alabes pa nan mes como persona. FPNM ta sumamente satisfecho con e workshop a bai y ta gradici sra. Dumfries pa su tremendo presentacion. Centronan cu a participa ta: Debbie Doo Speelschool; E Barco di Noah Speelschool; Little Zoo Speelschool; Pasa Dushi Pasa Pret Peuterschool; Smart Kidz Playschool; Tante Joya Speelschool; Traimerdia Kudawecha; Traimerdia Oranjestad; Walt Disney Speelschool; Dora y Diego Speeslchool;Happy Day Speelschool; Lilliputters Speelschool; Smile ‘n Shine;
Pasadia Infantil Te Aworo; Yupi Yupi Yah; Mannan Precioso y Sunnyside Daycare. FPNM ta felicita tur cabesante y lider cu a participa. Pa mas informacion tocante nos cursonan por tuma contacto cu nos na 588-0586/583- 4247 of bishita nos Facebook page.
