Fundacion Parke Nacional Arikok (FPNA) a publica un position paper di kico ta importante riba e tema di spearfishing pasobra nan tin preocupacion pa cualkier regla of ley pafo di parke marino y cu lo afecta nan maneho riba parke marino. E fundacion kier trece dilanti nan opinion y pa tur hende ta consciente di ambos banda, no solamente e banda social pa tene cuenta cu e hende pero tambe con pa tene cuenta cu naturalesa.
E punto di mas importante pa FPNA segun Sieske van der Wal, Biologo Marino di Parke Nacional Arikok, ta cu nan no ta contra pesca pero ta di acuerdo cu sustainable fishing. Loke nan kier ta pa tur cos sosode den area natural, pasa na un manera sostenibel. Esaki ta p’e proximo generacionnan por disfruta di naturalesa y por sigui pisca. No mester ta consciente solamente riba e pan di awe, pero tambe pa mañan y otro dianan.
Nan a dicidi di manda e position paper pa gobierno, cual na su turno ta den discusion si nan ta bay legalisa spearfishing. P’esey si FPNC no pone nan opinion riba papel, gobierno no tin esaki. Ta keda na gobierno si nan ta dicidi pa haci uzo di e loke FPNC a pone riba papel. Ley no ta cay bou di e fundacion, pero nan kier a vocifera nan preocupacion pa leynan cu ta toca naturalesa. Ta importante pa tin regulacion di spearfishing, pasobra no por lag’e bira free for all.
Piscadonan no kier p’esey pasa, ya cu nan kier pa generacionnan cu ta bin tambe pisca. Ta importante pa tin esey y tene cuenta cuanto hende por haya permiso, tene cuenta di cua herment si of no por uza, tambe mester tene cuenta cu especienan protegi. Tambe tin di evita haci daño riba coral y segun van der Wal, nan sa cu esnan profesional den spearfishing sa kico ta haci, nan intencion no ta pa haci daño na coral. Tin di evita esnan cu no sa ki mester haci pa no ocasiona daño.
