Gobernador Alfonso Boekhoudt riba 9 di juli a apunta mr. Evelyn Wever-Croes como formado. Durante di e simannan siguiente, e formado a informa Gobernador regularmente tocante e progreso y implementacion di e encargo di formacion. Awe formado a informa Gobernador cu e concepto di e acuerdo di gobernacion ta completa y cu e reparticion di carteranan ta casi finalisa.
Tambe e formado a papia cu un gran cantidad di organisacion durante di e ultimo simannan. E control di capacidad di e candidatonan pa e funcion di minister y di minister plenipotenciario no ta completa ainda. Mirando cu ta efectua e evaluacion aki como garantia di integridad di administracion publico, ta di importancia pa esaki sosode minuciosamente. Un screening minucioso ta tuma tempo. Ta dificil pa calcula su duracion adelanta.
Awe Gobernador a pidi formado pa riba 27 di augustus mas tarda, presenta na dje e acuerdo di gobernacion definitivo, e reparticion di cartera y tambe tur documento y conclusion relaciona cu e screening. Seguidamente Gobernador lo evalua e documentonan y papia cu formado tocante resultado di e analisisnan.
