E huida di e preso peligroso Gerson Martina a tuma lugar sin cu ningun hende a ripara. Mescos cune mas hende por a bay. Hopi cos ta hunga un rol cu tin un descuido den e proceso di vigila e presonan durante cu nan ta afo di nan celda pa lucht.
KIA ta un timebomb y despues di casi dos aña finalmente a logra nombra un director nobo algun siman pasa cu mester bay drecha y atende tur e retonan cu tin na KIA. KIA tin su cuidadornan paden y tambe nan tin esnan di CEA Cuerpo Especial Arubano cu ta traha pafo. Pafo nifica tur esnan cu ta drenta of Sali di prison ta pasa e control di CEA. Ademas nan tin un tarea den e schietpost of e toren rond di prison.
E problema ta cu tin schietpost cu no ta funcionando. Nan ta afgekeurd y esey nifica cu no por pone personal di CEA aden. Te awe no a drecha nan tampoco pa asina e personal arma por sinta eyden y haci nan vigilancia. E presonan sa precies kico ta pasando den KIA. Pesey mes nan sa tambe con pa move sin cu nan ta wordo gara. Gerson Martina a logra burla di e vigilancia dor di bula dos muraya halto. Nan ta lora e laken y usa esaki como cabuya pa rek y subi e muraya. Despues di bula e prome muraya a bay direccion di e Schietpost number dos cu ta afgekeurd y no tin hende di CEA presente.
Ta ser bisa cu a haya e porta di schietpost habri y eynan tambe parce algo no tabata bon. No ta custumber cu ta laga e porta di schietpost habri. Eynan a bin topa cierto material tambe manera biga of palo usa pa por a huy. Mientrastanto Gerson Martina ta fugitivo. E tin nuebe luna mas pa sinta despues di atraco cometi. Cerca Polis ta wordo considera hopi peligroso. Tres biaha el a intenta di mata Polis y den tur tres biaha Polis a keda herida cu cortanan serio. Pesey esnan cu sa di su paradero mester yama 11141 of 100 y avisa Polis.
