Awe ta ultimo dia pa paga number di auto pa 2024 y manera cu a spera, e filanan ta masha largo mes. No solamente na Departamento di Impuesto pero tambe na e filanan di DIMP den edificionan di MFA.
For di ayera caba a cuminsa ricibi keho for di ciudadanonan. Nan ta personanan cu presupuesto ta hopi preta y cada luna mester programa con ta bay paga nan recibonan. Y riba dje ta personanan cu no ta cobra manera ambtenaarnan cu den luna di januari ta haya nan salario y pago di un prima.
Of algun compania cu ta duna nan trahadonan un suma chikito den januari pasobra ta bini di december unda cu a cobra trempan. Un grupo grandi di trahado aki na Aruba ta cobra sea e penultimo of ultimo dia di luna. Y no tin forma pa paga nada adelanta. Y a sosode cu nan ta esnan cu mester bay para den fila largo pa paga nan number prome cu e fecha di pago vence awe.
Ademas, un gran parti di e pueblo no ta gusta of custumbra ainda cu e pago online. Y e consecuencia ayera y awe ta e filanan largo di hendenan cu a warda pa haya nan pago di luna pa cumpli cu e impuesto di auto.
Ayera caba na e diferente MFA-nan unda cu tin filial di DIMP a resulta cu no tin mas number pa paga. Tabata manda e clientenan pasa na e diferente MFA-nan pa mira si por haya un number. Ta masha hopi hende tabatin pa haci pago. DIMP mes dos dia prome cu e deadline a informa cu tin casi 80% di number cu no ta paga, o sea casi 70 mil vehiculo cu ta core na Aruba sin pago di belasting.
Awe nan a post e siguiente mensahe riba nan pagina di Facebook: Awe ta e ultimo dia cu por haci pago di impuesto di vehiculo di motor di aña 2024. Mester paga por lo menos e impuesto di e prome mita di aña. Tene na cuenta cu pa cierto categoria di plachi, no ta posibel pa paga e impuesto di mita aña sino ful aña, por ehempel plachi di brommer y plachi di nomber.
Esnan cu no ta sigur cuanto e suma ta, por consulta nan “registratiebewijs” of e recibo di pago di aña pasa. E tarifa no a cambia pa aña 2024.
Nos ta brinda servicio y yuda tur contribuyente cu acudi na nos oficinanan. Sinembargo, si acaso bira demasiado druk, tin posibilidad cu nos lo stop di duna number prome cu ora. Nos tin cu tene cuenta cu e siguridad di nos contribuyentenan y nos empleadonan.
Nos ta keda recomenda pa haci pago online via banco prome cu 12 or di merdia. E ta safe y sigur. Por lesa nos post di Facebook di ayera unda nos a duna un splicacion amplio. Alabes nos ta recorda cu awe no ta posibel pa registra un vehiculo di motor, haci cambio of entrega plach’i number. Esaki ta valido na tur nos oficinanan.”
