Feria di Papiamento di FLP tabata exitoso

Luna di Mei ta caminda cu Fundacion Lanta Papiamento a celebra 10 aña di su fundacion. Esey a tuma luga durante un actividad diadomingo. Alabes a celebra 16 aña cu Papiamento a bira un idioma.

Ta pa e motibo ey a organisa un Feria unda cu a duna oportunidad na diferente autor cu tin buki na Papiamento pa bin y bende nan Buki, Conta storia di nan buki. A invita diferente otro instancia manera Fundacion Bon Nochi Drumi Dushi, cu a percura pa e muchanan, unda cu nan tambe a conta storia.

 

Segun Lyonel Dirksz, tesorero di Fundacion Lanta Papiamento, tabata tin un Sesosport, cu a bay hopi bon. Despues a sigui e parti musical, e parti di canto, unda cu a invita diferente hoben cu a participa den Arte di Palabra, mirando cu Fundacion Lanta Papiamento ta kere hopi den Arte di Palabra, cual ta un estimulo pa nos hobennan sigui stima nos idioma Papiamento.FLP tin un calendario cu durante aña cu varios actividad. Algun siman pasa a tuma luga un tayer cu diferente presentacion di personanan cu ta bin di Corsou, Boneiro, cu ta bin conta storia relaciona cu e idioma. Durante transcurso di aña tin diferente otro actividad, mas tayer cu ta keda presenta.

Tambe nan tin Dictado cu ta un di e eventonan grandi cu ta tuma luga den luna di October y November. Y sigui naturalmente cu promocion di nos Idioma Papiamento. Dirksz ta gradici tur boluntario cu a yuda, tur instancia cu a yuda cu e feria di papiamento. Tambe ta gradici Ministerio y departamento di Cultura, cu a yuda financia e proyecto y tur cu ta forma parti di e Fundacion cu a traha pa diadomingo tin un actividad hopi exitoso. Hopi hende a bin, famianan henter. Hopi hende a bin pa haya mas informacion y motiva y inspira den nos idioma.