Formador Evelyn Wever-Croes a haci su bishita na Gobernador den cuadro cu formacion di Gobierno. El a bin duna algun update pa loke ta formacion y cual no solamente ta importante pa Gobernador haya sa, pero tambe ta importante pa pueblo haya sa. Tur hende ta pendiente pa mira con e Gobierno ta formando su mes.
Formador Wever-Croes a splica cu el a duna un briefing regular riba e proceso di formacion. Fin di siman pasa a drenta den e ultimo fase. Esey ta e fase di reparticion di cartera y fase di apuntamento di e candidatonan pa minister. Den e fase eynan a bin informa Gobernador con e ta bayendo. E ta bayendo bon, segun Wever-Croes. E ta mira e luz na final di e tunnel. Ta cuestion di algun rato mas prome cu por bisa cu ta cla cu e formacion, pasobra no ta cla ainda.
Den e siguiente ora y dia, internamente lo ta cla. E ora ta caba cu e reportahe. Esey no ta nifica cu ta full cla ainda. Den e fase aki, ta dependiendo di Departamentonan. Tin cu haci e parti di screening y e parti di screening ta depende, si wak e landsbesluit bon, tin algun departamento cu tin cu consulta. No por bisa cu ta cla sin haya e parti ey. E parti reparticion por ta cla cun’e. Despues ta bin ken ta bira minister pa cada partido. Esey ta depende un rato ora cu keda cla cu e Departamentonan. Tin contacto cu nan y no lo bay tarda mucho mas. Tin confiansa cu den e siguiente dianan nos dilanti lo tin e anuncio cu ta cla.
Reparticion di cartera
E reparticion di cartera no ta cla ainda, pero si a cuminsa papia di dje. Esey ta un di e puntonan ainda. Ta kedando cla y ta keda hopi cerca di otro. Disponibilidad y deseonan tey. Esey ta e aspectonan mas importante. Cada partido tin su deseo, cada persona y lider tin su deseo. Cada partido no por tin tur e ministerionan. Tin cu tene cuenta cu e palabracion den e protocol di Gobernacion. E ta un proceso cu ta tuma su tempo y tambe e ta crea mas confiansa den full e base pa e coalicion. Ta bezig cun’e y no ta full cla cu esey ainda.
Carteranan cu MEP no lo laga bay
Segun Evelyn Wever-Croes, en principio no kier laga ningun cartera bay. En principio, pa yega na un coalicion cu un base di confiansa amplio, bo por laga tur bay, pasobra tin e palabracionnan haci den e programa di Gobernacion. Esaki no ta un negociacion entre dos hende so. Esaki ta entre tres partido y esey ta haci’e un poco mas complica. Pero awor aki no por bisa cu no lo laga bay. Pero por bisa si cu Algemene Zaken, no tabata tin ningun otro cu a pidie, ni tampoco financien. Na e momentonan aki ta habri. Ya caba tin un diferencia pasobra na principio tabata tin algun di e carteranan cu definitivamente por laga bay. Awor aki tin e comfort level, e nivel di trankilidad cu den e programa di gobernacion e vision ta poni. Ta traha den un base hunto, den un ministerraad cu lo tuma decisionnan final, cu aunke no ta bo partido, bo tin influencia kico lo wordo treci aden.
Ministerio di Husticia
Andin Bikker semper a aspira como minister di Husticia. Segun Wever-Croes, cu Andin Bikker su deseo pa bay husticia, ta conoci. Ta algo cu nan a pidi y a pidi pa mas cos. MEP y RED tambe a pidi pa mas cos. Den tur eseynan tin cu wak pa yega na otro.
8 ministerio
Wever-Croes a bisa na un principio cu si ta p’e ta keda 7 ministerio. Sinembargo tin cu realisa cu pueblo a papia diferente. Pueblo a bisa cu kier un coalicion. Den esaki, ta haya hopi conseho di tur banda con pa atende cu e tema aki. E problema den nos pais ta hopi serio. Tabata tin Gobierno di 9 den pasado, cu no a duna miho gobernacion. Tabata tin gobiernonan di 7 cu si a duna miho gobernacion. E retonan awor aki ta diferente cu cualkier otro gobierno cu tabata tin den pasado. Cosehonan cu Wever-Croes ta haya ta diferente. Tin ta bisa cu e problemanan ta demasiado serio y cu no lo keda cla cu 7. Den un otro conseho ta mira cu den 7 no ta mira e refleho di e resultado di eleccion si bo kier duna cada partido 1 cartera. Por ehempel RED tambe a haya un cartera y den 7 bo no ta mira e refleho 9,2,1 bek. Pasobra mester tin un Gobierno caminda cu RED ta participa, pero no tin ningun minister y esey no ta un partner full fledge. Door di inidicacion di pueblo tabata, ban traha un Gobierno amplio. Instruccion di Gobernador ta un base mas amplio posibel. Bay e extra mile pa tin tur tres partido on board, cual ta importante pa stabilidad di nos pais. Ta bayendo den e extra mile. Si esey ta nifica na fin di dia cu lo ampli’e, Wever-Croes lo ta e prome pa bin y admiti y splica dicon. Pero pa awor aki ta tiki prematuro pa bisa.
