Den un ambiente diferente den sala di Cas di Cultura, cu un demostracion di pelicula chistoso, Cas di Cultura hunto cu Faritah Luidens y JasonCR a habri e conferencia di prensa presentando e obra “Ken ta Basha Abou” cu ta celebra e di 50 aniversario den farandula di Faritah “Tica Bashabou” Luidens.
E dama icono Arubano aki, personahe di television, canto y teatro a prepara un show spectacular cu su ekipo di actornan local. E show lo representa un montaña Rusa di emocion di hari te yora y lo laga publico cu gana di wak mas!
Cas di Cultura den su afan pa stimula teatro bek riba e tarimanan di Aruba, ta sumamente contento y orguyoso cu e colaboracion aki y ta spera cu e aprecio pa teatro crece mas y mas. Na mesa tabata Jason Croes, orguyoso yiu di Faritah, yudando cu tur aspecto di multi media, Luty Martinez ‘stage director’ di e show y Vicky Arens, directora di Cas di Cultura. Tur poniendo na mihor pia dilanti pa resalta un artista y obra Rubiano di calidad halto.
E ekipo organisador, esta Cas di Cultura, Faritah Luidens, Jason Croes, tur actor y colaborador ta invita henter pueblo di Aruba, di 16 aña p’ariba (!), pa bin disfruta di e obra festivo, chistoso y bunita aki. E prome show lo ta dia 22 di september y lo sigi cu tres show mas dia 3, 4 y 5 di october. Ticket obtenibel na Cas di Cultura, Superfood, Checkpoint Color, Petje’s en Home Fun Super. Nos kier topa tur comer y comper, yega sin falta!