Cuanto tempo mas e hendenan mester keda soporta e adicto van der Bliek. E persona aki ta un constante molester pa tanto habitantenan na Playa como na Noord, areanan den cual e ta circula continuamente.
Van der Bliek por horta for di un cos chikito sin balor te na algo di gran balor. E daño cu e ta causa ta hopi mas grandi y e ta sigui riba caya, apesar di a comete varios delito ultimo tempo. Su problema grandi ta e adiccion pa cual na cualkier momento cu e tin necesidad pa su droga, e ta busca pa horta cualkier cos.
Diamars atardi mes e tabata causando problema y Polisnan a detene na parada di bus chikito na Playa, segun e prome informe, debi cu el a comete destruccion na un auto. Pero na e sitio polis a papia cu diferente persona kendenan a bisa cu Van der Bliek tabata causando masha molester y ta haci fastioso. Nan a bay cun’e warda pero probablemente e lo no keda mucho cera. Den un luna e persona aki ta keda deteni varios biaha, pero semper ta sali bek cla pa bay en busca di su siguiente victima. E pregunta ta: Cuanto mas e victimanan por sigui soporta van der Bliek.
Recientemente e tabata envolvi den un caso di robo di un chuculati den un supermercado na Noord. Prome cu esey, el a pasa man pa dos airco cu tabata poni riba un tereno priva den Havenstraat. Tin biaha e casonan t’asina chikito cu e victimanan no ta bisa no ta bal’e la pena entrega keho. E situacion lo bira pio ora cu un di e victimanan aki fada di su malhechonan. E ora cos lo a sali di man y ta demasiado laat.
