Famianan Arubiano tambe ta preocupa cu e maneho cu ta wordo hiba door di Guarda nos Costa. Glenda Maduro ta un di e personanan cu ta preocupa. El a conta cu e ta hopi disgusta.
El a wanta e cos aki como 47 dia scondi. Hopi hende a purba di yuda, pero no a logra cu nada. El a entrega un raad pa un famia di dje cu ta cera. El a keda 47 dia cera. Gran parti di e dianan aki, ora cu nan a mira cu nan a pidi asilo politico, nan a manda nan Dakota, sigur 27 dia sin wak luz di solo, cera eyden.
E luga mes no ta adecuado pa tene e hendenan eyden, segun Maduro. E ta sigur cu tin comentarionan cu e hendenan aki ta ilegal pa nan bay nan pais. E hendenan aki tin famia. E hendenan aki a pasa den cosnan duro.
Den e caso di un mucha homber aki, tabata un trahado fiho di PDVSA. El a bandona su trabao pa motibo cu Maduro tabata busca nan, hincanan den bus y bay cu nan pa protesta na Caracas, pone nan bida na peliger.
El a bandona su trabao 8 luna pasa y a bin Aruba. Un persona cu Maduro conoce mas cu 4 aña y e mes como persona nunca el a laga un hende keda ilegal na su cas.
Imigracion sa esey tambe, cu nunca el a laga un hende ilegal na su cas. Semper su hendenan tabata legal. El a busca tres luna y haci tur e rekisitonan concerni pa e personanan aki ta na Aruba.
Den e caso di e mucha homber aki, el a keda 7 luna na Aruba, pasobra 4 biaha nan a hort’e na Venezuela, pa apostiya su papelnan. Dia cu el a drenta Aruba, Maduro, como ciudadano di e pais aki a kere trece tras di su prome minister, caminda cu prome minister di Aruba ta bin p’adilanti, ta bisa cu Aruba no tin ley di asilo politico. Na aeropuerto cu pidi, bo no ta haya asilo politico.
Awo diripente ultimo lunanan aki tur hende tabata pidi asilo politico y imigracion tabata duna nan un papel di asilo politico. Pero como Arubiano, no tabata sa cu e derecho di asilo politico ey por a pidi’e na aeropuerto.
Maduro a kere tras di su prome minister. E mucha homber aki a haya su oportunidad den Guarda nos Costa, cual Maduro ta haya ta un abuso. Ora cu e tabata den e luga, e tabata un di e ultimonan cu a yena su papel di asilo politico, pasobra aparentemente ley ta bisa cu dos dia despues cu wordo deteni, bo ta bay na aeropuerto cerca un tal Lori y ta bay yena papel di asilo politico. Den e caso di e mucha homber aki, ora cu el a wordo deteni, Maduro a laga traha un carta, pa pidi asilo politico y a entreg’e na Dimas.
Dimas na su turno mester aproba e asilo politico y esey no a wordo haci.
Kico a pasa
Awor aki e gobierno ta gañando e hendenan aki tambe. E proceso no ta bon, segun Maduro. Pakico tin cu duna un hende speransa cu nan ta bay haya un asilo politico, sea na aeropuerto of na Dimas. Esey no ta e caso. Den e caso di e mucha homber aki, no a ni hib’e aeropuerto pa yena un papel pa asilo politico.
Nan a trata e asilo politico cu tabata na Dimas.
Di un otro banda Dimas ta rechasando tur asilo politico. No tin un hende cu a haya asilo politico aki na Aruba. E prome hende cu a haya asilo politico, tin cu bin p’adilanti. E cos ey no ta berdad. Si un prome minister ta bin padilanti y bisa cu si, cu durante tanto luna 600 hende a pidi. El a suma na 900. Tur 900 a wordo nenga. Dicon ta bay manera spectakel bay Hulanda bay pidi placa pa refugiado. Unda e placa di refugiado ta, na ken ta bay gast’e. Unda e tent ta. E hendenan aki tin mester di ayudo.
Nan no mester pa nan wordo deporta awor aki. Tin famia cu por responsabilisa pa nan. Pakico not a duna nan e oportunidad ey. Pakico mester corta hala di e hendenan aki. E mucha homber aki, Maduro ta responsabel p’e. Nan a saca nan. E mucha homber tabata afo, el a haya meldplicht, ora cu tur e otronan a haya. Supuestamente Dimas a rechasa su permiso, nan a want’e bek. A entrega un caso den corte y huesnan di un otro banda tur ta set di corupto. Nan ta bisa cu e peticion cu el a haci tabata e forma con el a wordo cera. Aparentemente, e bevelschrift no tabata bisa de cuanto termino e tin cu wordo deporta.
Loke ta pasa ta cu probablemente e hefe di Guarda nos Costa, ta pensa cu por ta cu hende no sa di ley. Maduro kier a recorda e hefe di Guarda nos Costa cu e ta mesun ambtenaar cun’e. Ta bay cerca e persona aki, ta papia cun’e dicon ta wanta e mucha homber y el a bisa cu Maduro no tin derecho di haya e carta di Dimas cu el a wordo rechasa. E mucha homber no tin derecho mas di haya meldplicht.
Ley ta bisa cu despues di 7 dia di e negamento di e asilo, e por regla su cosnan. Con e ta bay regla su cosnan cu e ta cera? Maduro a purba si por wak e mucha homber, a bis’e awe tardi. Pero Maduro ta sigur cu e lo haya represalia cu e no por wak e mucha homber.
Di parti di gobierno, nan mester busca pa haci algo. E cos aki no por, segun Maduro. Si e ta para responsabel pa e persona aki, dicon tin cu detene bek. Pakico no ta dun’e meldplicht te ora cu su caso bin p’adilanti of te ora cu frontera habri. Ta bay tene nan cera si ta te December of otro aña cu frontera ta bay habri? No ta bin padilanti cu ta costa 275 florin pa persona pa dia, siendo cu tin Arubiano cu por responsabilisa pa nan?
E mucha homber no tabata falta un dia pa meld. Pakico retene, Maduro ta cuestiona. Pa bolbe hink’e na Dakota pa e bolbe keda tanto dia sin wak luz di solo? Ta un abuso, Maduro a expresa y e cos aki mester caba.
Maduro hera a hinca rudia dilanti e ministernan pa e asunto aki. Ministernan cu ta gañ’e. E tin mensahenan di voz: “Mi ta p’abo”. Y te dia di awe, nada p’e. Pa otro si. Nan ta bay casa. Ley ta bisa cu nan tin cu keda afo warda permiso di matrimonio, pero aki nan ta. Awo no por yuda otro. Nan si por, nan por casa, nan ta bin cu nan casa aki. Nada no ta pasa. Nan no tin derecho di warda nan permiso afo.
Pakico? Pasobra bo ta minister. Un ciudadano no por haci mesun cos. Y ora papia cu nan nan a bisa cu nan lo yuda. Tur a bisa cu ta yuda. Tin algun parlamentario si, cu a hinca nan man cu por a papia, pero por lo general ningun otro mas. Puntra durante di eleccion, e ora si, tur pregunta cu haci via Whatsapp nan ta contesta.
Maduro a bisa cu awe e tin un palabra so pa e gobierno aki: Si boso nan kier laga Trudy Hassel keda haci y deshaci den e departamento aki, Andin, abo ta morto como politico. E muhe aki ta bay caba cubo. No mester lubida pasobra e hendenan aki tin famia Arubiano cu tin derecho di voto. No ta ilegal ta conta pa voto, sino Arubiano ta conta pa voto.
Maduro ta bay keda lucha pa haya libertad di e mucha homber aki. E secrecia aki a caba cun’e. E cos aki ta un abuso. Maduro a cana y den e prome siman e tabata manera hende loco. El a bira flaco. El a pasa trabao, e ta pasa ta yora tur dia saliendo for di eyden, pasobra cu tin eyden no ta husto. Na Dakota ta pio. Un baño tur sushi, un baño sin porta. E hendenan aki no merece e cosnan aki, nan ta hende mescos cu nos. Pidi Trudy Hassel bisa si no ta berdad. Bay Dakota bay wak e situacion.
Maduro no ta kere Trudy Hassel. E ta kere loke e hendenan cu tin cera eyden ta pasa aden. Maduro no tin nada contra e trahadonan di Guarda nos Costa. Nan ta tolerabel. Pero no e señora aki. No tin un huishoudelijk reglement. E ta dicidi si un hende mag di bin cu un fruta, y e otro dia no. Tur parti di mundo, rijbewijs, paspoort y ID ta identificacion. Pero Hassel ta exigi tin biaha pa permiso di trabao. Unda na mundo un permiso ta un identificacion. E ta bisa algo contrario. E por gaña. Maduro por bisa berdad, pasobra e hendenan ey den ta bis’e. El a kita derecho di telefon di e mucha homber pa motibo di un voicemessage. Maduro no por bisa si su famia sa di dje.
