Ta solamente Dios por a duna un regalo asina valioso , manera famia, for di den buki di Genesis Dios a demostra e formula di un famia den Genesis capitulo 2 vers 24 ta para scirbi: P’esey un homber lo bandona su tata y su mama y lo uni cu su esposa, y nan lo bira un carni.
Cristo Hesus ta cabes di e homber, e homber ta cabes di e muher, y asina e yuinan lo biba den obedencia, pasobra nan mayor ta somete na Cristo y nan tambe lo bira imitadornan di Dios manera ta para scirbi den Efesios 5 vers 1.
No tin nada mas dushi cu un famia uni, yena cu amor pa otro, un ta cuida otro, nan ta pordona otro, y ta haci tur locual ta posibel den nomber di Hesus pa felicidad reina den cas.
Dios a duna homber y muher for di principio, e autorisacion pa multiplica, esey ta nifica cu solamente for di homber y muher por sali ser humano, Awendia nos tin famia grandi y famia chikito.
Y esey nos por yama danki solamente na Dios kende a pone den nos un simia di multiplicacion.
Despues di multiplica, Dios a duna e orden pa lanta e yiunan den caminda di Dios, pasobra hende ta traha na Dios su imagen y semehansa, p’esey hende mester obedece Dios, no tin ningun beneficio den desobedencia.
Salmo 128 ta mustra e grandesa di e famia cu tin temor di Dios caminda mama y tata ta biba drechi cu otro.
E Salmo ta splica e beneficionan pa famia: Bendiciona ta tur esunnan cu ta teme Señor y ta cana den su camindanan, den un palabra bisa nan ta biba den obedencia na Dios.
Ora bo come di e trabao di bo mannan lo bo ta feliz y lo bay bo bon. Aki nos ta mira e resposanbilidad di un tata, e cabes di famia, esun cu Dios a encarga pa pone pan riba mesa, esun cu tin cu bay den oracion y asina tur hende den cas sigui e y henter famia ta wordo bendiciona.
Bo esposa lo ta manera un mata di wijndruif, fructifero, den e parti mas paden di bo cas, bo yuinan lo ta manera palo di oleifi rond di bo mesa. E garantia cu Dios ta duna un tata , ora e guia su famia den caminda di Dios. E esfuerso di e tata lo resulta den bendicion pa su yiunan, pasobra bendicion y fabor di Dios ta core for di cabes. Un tata su obedencia na Dios lo wordo comberti den bendicion pa su yiunan.( Genesis 26 vers 5).
E homber cu tin temor di Dios como tata di cas lo wordo bendiciona.
Señor lo bendiciona bo pa asina bo mira bo generacion completo. Asina grandi e bendicion di Dios lo ta riba un famia.
P’esey como mayor nos mester duna bon ehempel na nos yuinan, ta nos ta e prome yama pa disciplina y coregi, ta nos ta e modelo pa nan bida, nan ta confia nos mas cu tur hende, ora nos faya nos mester pidi nos yiunan despensa, pa asina tin un balansa social den cas.
Nos ta yama pa stima nos yiunan, y wak hopi bon kico nos ta sembra den nan, evita mas tanto posibel di insulta, rebaha, herida, traiciona nos propio famia.
No tin placa na mundo pa compara cu e balor di Famia, no tin hende cu por reemplasa mama y tata original.
Sinceramente,
Pastor Marcel Balootje.
