Dialuna 17 di Augustus 2020 Famia Planea Aruba (FPA) a lansa nan proyecto di mas nobo titula ‘Online Puberty Education News (OPEN) – Program. Un proyecto pa informa, educa, motiva y ekipa nos muchanan y hobennan riba e aspecto di pubertad, crecemento, sexualidad y mucho mas.
Introduccion
Durante COVID-19 Famia Planea Aruba a mira un crecemento enorme den e servicio di ‘Online Counseling’ como tambe e servicio di ‘Delivery Service’. Na e mesun momento COVID-19 a haci cu scolnan na Aruba mester a cera pa un par di luna y esaki a haci cu a bin un paro na e servicio di provee ‘Educacion Sexual Integral’ na diferente scol aki na Aruba. Importante pa menciona ta cu Famia Planea Aruba a keda habri durante ful e periodo aki y asina provee diferente servicio pa asina yuda comunidad completo keda tuma control di nan salud sexual.
Ta bon pasa cu den transcurso di añanan 90, FPA a ahusta su strategia di tin accesibilidad na diferente metodo anticonceptivo pa uno cu ta mas enfoca riba informacion, guia y educacion sexual. Esaki ta haci den colaboracion cu diferente partner internacional strategico manera; International Planned Parenthood Federation, UNFPA Caribbean, Amaze.org y Rutgers unda ta crea programa di educacion sexual integral, mas completo posibel y adapta na nos generacion actual, cultura, norma y balor.
Normalmente durante luna di april, mei y juni Famia Planea Aruba ta bishita practicamente tur scol basico pa asina duna un workshop di ‘Educacion Sexual Integral’ na tur klas 6. Na aña 2019 a logra duna 8.230 hoben, minimo un programa di ‘Educaion Sexual Integral’. E hecho cu pa motibo di COVID-19 e servicio aki a cay afo, a motiva FPA pa introduci un programa digital pa asina keda informa no solamente nos muchanan y hobennan pero tambe adultonan.
Un reto cu a converti su mes den un oportunidad pa reenforsa e comunicacion entre FPA, mayornan y educadornan.
Kico ta (OPEN) – PROGRAM?
OPEN-Program ta un programa digital y ta para pa ‘ONLINE PUBERTY EDUCATION NEWS’.
Un programa pa sostene mayornan y educadornan encuanto e crecemento y fase di desaroyo di nan yiunan y asina informa, educa y sostene cada un mucha y hoben encuanto nan salud sexual. Un programa cu tin como grupo meta muchanan y hobennan entre e edad di 10 pa 14 aha di edad.
OPEN – program ta un video educativo, creativo y interactivo cu ta dirigi su mes riba e cambio grandi di mucha pa hoben yama pubertad.
E programa aki ta trece dilanti diferente topiconan importante manera pubertad, crecemento, cambionan fisico, como tambe ta papia di salud sexual, weganan di sexualidad, sexting y mucho mas. OPEN – Program ta parti den 4 seccion, un seccion informativo, un seccion di ‘Tell us about it’/entrevista, un seccion di ‘international news’ y tambe un seccion di ‘pop-up facts’. Famia Planea Aruba a percura pa e informacion brinda forma un combo completo y un base solido den educacion sexual di nos muchanan y hobennan riba e aspecto fisico, emocional, social, spiritual y cognitivo. Famia Planea Aruba ta consciente cu un hoben entre 10 cu 14 aha di edad oficialmente no ta suppose di tin acceso na e plataforma di Facebook. Pa e motibo aki FPA ta acerca y encurasha cada mayor y educador pa join FPA den e movemento di educacion sexual cu ta birando dia pa dia mas importante y necesario den e crecemento, desaroyo y proteccion di cada mucha y hoben.
FPA ta invitabo pa laga bo yiu(nan), sobrina, sobrino, alumno, familiar of amistad cu ta entre e edad di 10 pa 14 aha pa bishita e pagina di Facebook: Famia Planea Aruba y click riba e link oficial di e ‘ONLINE PUBERTY EDUCATION NEWS’ program.
Ban demostra cu hunto como comunidad nos por informa, educa, motiva y ekipa nos muchanan y hobennan pa asina nan por tuma decisionnan responsabel pa cu nan curpa, bida y futuro.
Corda semper cu si tin mas pregunta of cu si ta desea un consulta, conseho of presentacion por tuma contacto cu nos libremente na 588-9591 of [email protected]
Famia Planea Aruba, aportando na bo calidad di bida!
