Famia Planea a bin ta enfocando hopi riba un campaña cu nan a lansa recientemente yama Ami ta Dicidi 2020. Un campaña cu aunke su enfoke ta e hobennan, e ta valido pa adultonan tambe.
Famia Planea Aruba (FPA), ta cla pa sigui duro cu e campaña aki den e ultimo dianan di periodo di carnaval pa brinda informacion y ta kere firmemente cu e hobennan ta bon ekipa cu informacion pa nan por tuma e decision corecto pa loke ta nan curpa, bida y salud sexual.
Segun Jonathan Trinidad, coordinado di Famia Planea Aruba, e campaña mes a bay sumamente exitoso. No solamente den sentido di e workshop cu nan a duna, pero tambe pa loke ta trata clientela, esnan cu a bishita nan na oficina pa haya mas informacion, sino tambe pa sigui mira e importancia pa sigui trece mas persona na FPA pa tuma di biaha e control di nan salud sexual.
No solamente den e parti educacional, sino tambe e ocho diferente servicionan cu e organisacion ta brinda. Esey ta haci cu ta wak bek na un temporada fructifero, pero no cu tin un final. No mester lubida cu ta henter aña e organisacion aki ta traha riba conscientisacion di un bida sexual sano, brindando diferente tipo di proteccion cu por uza, specialmente bou di e hobennan pa evita embaraso hubenil.
Pa loke ta e campaña Ami ta Dicidi 2020, ta full programa pa maart y april, haciendo cu esaki ta sigui. Cu otro palabra, nan ta keda traha pa yega mas cerca di e hobennan. Nan ta calcula cu durante henter añanan nan ta provee of reparti 160 mil paki di condoom, via di diferente instancia. Pero loke ta hala atencion ta cu specialmente pa e temporada aki di carnaval nan tin 20 mil paki di condoom, segun a wordo bisa na 24ora.com. Esey ta e motibo cu e hobennan (of adultonan) por busca esaki via di Cruz Corra of Kiwanis Club.
Bon ekipa
Trinidad ta sigui conta cu pa loke ta trata condom, cu ta e unico metodo cu ta proteha contra embaraso y malesanan transmiti sexualmente, manera tur aña, ta un campaña cu nan tin varios aña andando caba. Ta entrega condoom pa reparti na partnernan strategico manera Rode Kruis, Kiwanis Palm Beach y principalmente durante e temporada aki condom ta disponibel completamente gratis na FPA.
A haci esaki durante diferente aña y a mira e importancia di no solamente reparti, pero mas cu claro aporta na e conscientisacion. Bo ta aporta di un two-in-one, na e mentalidad di e comunidad completo y haciendo nan consciente cu si nan mester di e producto y sa unda nan por haya esaki.
Esey ta haci tambe cu si bo ta un hoben of un adulto cu por ta of ta sexualmente activo, bo tin mester di condom, principalmente den e ultimo dianan aki pa loke ta trata e temporada di carnaval. Personanan por pasa libremente pa busca nan condom pack.
Sin lubida cu riba e ruta di carnaval lo bay tin paketenan di condom disponibel cerca miembronan di Rode Kruis cu facilmente por acerca y pidi esaki y tambe na e tent di ambiente di Kiwanis Palm Beach, cu ta haci cu ta keda mas cerca ainda di tur persona, y haci nan mas consciente tambe.
Conscientisacion
Esey ta haci cu FPA no solamente tin e parti di duna producto, sino e parti cu bo ta mira un cambio den transcurso di luna of hasta añas pa loke ta educacion sexual, pero mas cu claro e comportacion sexual di hoben y adulto. Esey ta haci cu FPA ta kere y para firmemente cu den e caso aki no ta solamente e producto so, pero e informacion cu nan ta haya cun’e pa nan por pasa door en door di dje, mira e importancia di dje y finalmente implementa esaki, ta importante.
Esey ta keda un parti hopi importante pa FPA, pasobra nan ta kere firmemente den e caso aki, cu educacion ta e clave di exito, pero tambe sigur pa aporta positivamente na e prevencion pa loke ta trata malesa, embaraso y aporta positivamente na e comportacion sexual.
Palabranan final
Trinidad ta menciona cu nan ta bezig ta atende tur persona, scol y gruponan cu a acerca FPA pa Ami ta Dicidi 2020. No solamente ta gradici nan y tur otro cu a mira e importancia pa esaki. Aworaki e hobennan no solamente nan ta bon informa, pero tambe ekipa cu informacion y tin hermentnan pa tuma e decision responsabel, no ta keda nada otro di desea tur hoben y adulto un dushi ultimo dianan di e temporada di carnaval. Disfruta di dje sanamente y den e caso aki, sea consciente cu si bo mester bo producto bo sa unda pa por haya esaki. No solamente riba ruta, pero sigur tambe cerca Famia Planea.
