Dia 15 di Mei ultimo, a yega na nos mesa di redaccion un caso di un hoben di apenas 12 aña cu a haya sangramento pisa na su orea, cu consecuentemente tabatin efectonan basta negativo pa su salud. Famia a tuma e pasonan necesario y hib’e hospital, pa haya e tratamento medico rekeri. Sinembargo, ya for di un principio, nan a cana un caminda di cruz, cu no a keda nada otro di hib’e Colombia cu ayudo di algun donacion y riba cuenta propio.

Segun famia, nan subrina Eimy a biaha pa Colombia dia 15 di Mei mes. Pues a bay AZV y nan a splica cu tin un protocol y cu nan no por haci nada pa Eimy te ora cu e pasonan poni den nan “protocol” wordo tuma. E mesun dia ey famia a acerca Ministerio di Salubridad y a entrega un carta di 3 pagina splicando e caso di cuminsamento te na final.

Door di ausencia di Minister, e carta a wordo ricibi door di su hefe di staff y a wordo remiti na e Minister encarga cu Salud na e momento ey, esta Minister Andin Bikker, kende na su turno a haci un peticion na AZV pa studia e caso mas pronto posibel.

E carta aki a sali di bestuurkantoor diahuebs 16 di Mei 8’or di mainta y a yega AZV e mesun dia prome ora. Famia no a tende nada mas di AZV y a purba di haya contacto varios biaha pero no a logra. For di Ministerio di Salud a compronde cu nan no lo por haci nada mas y cu mester warda riba AZV.

Diabierna 17 di Mei a manda un di 2 carta kende a bay pa Director di AZV, Ruben Goedhoop y tambe dos consehero di Minister Dangui Oduber. Sinembargo famia no a haya contesta ni di AZV ni di Ministerio di Salud. Diabierna 4.10pm famia a ricibi yamada di AZV y a papia cu un Dokter di AZV y un hurista kende a bisa cu nan ta yama pa pidi informacion di e caso.

Nan a papia cu un gemachtigde cu e Mama di Eimy a laga na Aruba pero e combersacion aki tabata sin solucion. Pues nan a bisa cu aunke cu a ricibi e carta diahuebs 8’or di mainta y nan ta na altura cu e ta un spoedgeval, nan no por haci nada te ora cu nan sigui e “Protocol” cu AZV tin. Famia a splica nan e situacion cu Eimy y su mama ta pasando aden na Colombia.

A pone nan na altura cu Eimy su mama a biaha cu solamente 500 florin pa Colombia. Prome dia Eimy mester a haci testnan cu a costa 200 dolar y di dos dia e mester a sigui haci test y cumpra algun antibiotica cu a wordo receta door di dokternan na Colombia.

Famia a splica nan cu e caso di Eimy ta un caso di emergencia y cu cada dia cu pasa ta un dia mas cu Eimy no por cana y cu mas organo di su curpa por wordo afecta. Pues aunke na Aruba a diagnostica cu Eimy no tin nada, na Colombia e diagnostico ta mustra otro. Dialuna Eimy tin cu haci 3 test na Colombia (labyrinthitis, Balans test y Audiometrie). Ta di remarca cu e testnan aki a wordo autorisa door di un specialista di oido na Aruba Dr. R. pero na mesun momento nan a wordo nenga door di un Neuroloog di Hospital dr. E.K.

Lamentablemente aunke cu e famia a propone pa reuni cu AZV e mesun momento cu nan a yama y entrega na nan e machtiging cu tin pa atende e caso, AZV a splica cu nan no por pasobra ta diabierna atardi 4.30pm y cu nan oficinanan lo cera y no tin nada mas cu por wordo haci pa e fin di siman aki, sin duna importancia na situacion cu Eimy ta pasando na Colombia.

AZV a pidi pa presenta na AZV dialuna pa purba busca un solucion sinembargo no a duna importancia na e hecho cu awe un mucha y su mama kende ta paga AZV pa añas caba ta na Colombia sin ningun seguro medico pa por yuda nan.

Famianan ta purbando di cera un seguro Medico pa Eimy na Colombia pero esaki ta dificil teniendo na cuenta cu e no ta biba na Colombia y cu si e seguro medico aki wordo cera mes Eimy no lo por wordo atendi di biaha pero lo mester warda 72 ora pa por haya den ayudo medico den caso di un emergencia.

Famia ta enfatisa cu e salud di nan subrina no tin NINGUN color politico. Y cu esaki no ta un yamada pa ricibi atencion. Locual ta pidiendo ta un solucion. Pues ta Eimy su derecho pa por haya e cuido medico necesario. Famia lo informa pueblo di e reunion cu AZV dialuna.

Comments

comments