Den e episodio aki FADA (Fundacion Anti Droga Aruba) lo bay enfoca un poco mas riba salud mental. B’a yega di pensa con dificil e ta pa habri y papia cu un persona riba loke bo ta sinti, of ora bo ta sinti bo tristo sin motibo?
B’a yega di pensa con dificil e ta pa splica famia of amigo e sentimento pisa cu bo ta carga den bo pecho sin por compronde e motibo?
Con dificil e ta pa compronde ora haya un ataca di panico, cu ta aparece sin ningun notificacion. Con dificil e ta y cuanto miedo e ta crea ora cu ta sinti bo cu mundo ta cay den otro y tin un peso enorme riba bo schoudernan.
Hopi biaha esaki ta loke desbalansa di salud mental ta trece cu ne. Bo ta sinti bo ta biba cu un monster cu bo no conoce.
Jamie lo conta den su storia un poco mas di su desbalansanan cu salud mental tin cu ne. Entre otro high functioning anxiety. Un condicion cu un hende no sa cu ta funcionando bao presion di ansiedad y ta sigui funciona normal te na un momento cu e ta yega na un punto di cay den otro.
Jamie lo conta tambe un parti di su infancia cu a causa un trauma enorme riba dje como persona y lo splica con el a yuda su mes di e situacion aki, por medio di entrega y acepta cu e tin desbalansa cu salud mental.
E bataya di salud mental no ta facil y hopi biaha no tin cura, pero si tin yudansa y guia con pa controla y biba un bida mas balansa.
E episodio aki lo ta dia 10 di october, riba e mesun plataforma aki, esta 24ora.com, pa 9:00 pm. No perde e programa interesante aki, presenta pa FADA Aruba. Haya sa kico mas e tema di salud mental ta encera y conoce e storia di Jamie.
