Diabierna a tuma luga un reunion masha secreto mes entre minister Geoffrey Wever y e gobernador di Estado Falcon, Victor Clark. Nos a presenta na Harbour House, caminda cu e reunion a tuma luga pa un entrevista cu e mandatario, como tambe e representante di Venezuela, pero lamentablemente a pidi nos pa bandona e luga inmediatamente, ya cu como media, nos no tabata bonbini n’e reunion.
Riba medio social por a mira cu e gobernador di Estado Falcon tabatin un tour den e area di Corsou y tambe na Aruba, y asina aki a reuni cu diferente departamento gubernamental, manera Aduana.
Kico Minister Geoffrey Wever tin di sconde, ta keda straño. Mainta a puntra e minister en cuestion durante un conferencia di prensa, kico ta e situacion pa loke ta e frontera cu Venezuela, ya cu e frontera maritimo ta habri, pero esun aereo ta cera. Tambe a puntr’e mas riba con e ta mira cu Venezuela, como un partner strategico pa loke ta comercio entre Aruba y Venezuela.
Segun e minister, Aruba Fair Trade Authority no ta un promotion agency pa gobierno. E no ta algo cu ta bay den sentido promove pa tin por ehempel mas trade cu Venezuela. Esey ta algo cu semper nos como pais ta parti di nos maneho pa tin trade internacional, segun e minister.
E ta sigui bisa cu algun luna pasa a bay cu un delegacion comercial Colombia, pa fortifica e lasonan comercial, pa introduci comerciante Colombiano cu esun di Aruba y pa Venezuela tin e mesun deseo pa nos comerciantenan por reinstitui nan lasonan cu e empresanan Venezolano y viceversa pa por tin mas comercio, miho producto, miho prijs. Esey ta algo cu ta trahando riba dje.
Dentro di poco, y a anuncia esaki caba, lo bin cu un virtual matchmaking entre e comerciantenan di Aruba y Venezuela, y ta preparando tambe pa mas intercambio, mas contacto, entre nos comerciantenan.
Awo dicon minister Geoffrey Wever no kier a contesta realmente e pregunta relaciona cu e bishita di e gobernador di Estado Falcon, Victor Clark, no ta conoci. Pero si ta keda pendiente pa haya contesta riba e preguntanan cu nos a haci.
MIENTRASTANTO NA CORSOU
Mientrastanto na Corsou esaki ta totalmente contrario. E propio gobernador a post diferente potret riba su cuenta di Instagram, caminda cu el a reuni cu tanto prome minister Pisas, como e demas mandatarionan manera e minister di desaroyo economico di e isla, Ruisandro Cijntje y tambe e director di oficina di turismo Muryad de Bruin y demas funcionario di Aduana y Waf.
Esaki tin di haber riba e debate riba e avance encuanto e comercio exterior entre Venezuela, a traves di e reapertura di frontera maritimo y aereo for di estado Falcon pa Corsou.
Aki tambe el a sa di reuni cu e Asociacion di e Barquitonan cu ta staciona n’e mercado flotante di Punda, unda cu el a saluda e comerciantenan di berdura y fruta.
Na Corsou tur cos tabata mas habri ya cu prensa riba nos isla ruman tabata mas envolvi den e presencia di Victor Clark.
Kico Aruba tin di sconde y dicon a core cu prensa di e estado ey, ta keda un misterio y sigur ta interesante pa sa e resultado di dicho reunion cu Wever.
