Diahuebs Fundacion Arubano pa Esnan Visualmente Incapacita (FAVI) lo tene un karaoke special, Christmas Edition, dia prome di december.
Tabata e mesun clientenan di FAVI cu a bin riba e idea pa organisa cu karaoke pero cu canticanan di Pasco. Catherine Midi, stagaire EPI a conta cu ya caba tur e preparacionnan ta cla y nan ta simplemente warda e dia yega. Mientras tanto, e clientenan ta sigui train.
E karaoke lo tuma luga diahuebs, prome di december for di 9:30am te cu 11:30am, na FAVI mes y nan tin mas o menos diescinco cliente cu lo participa. E tabata un idea di e mesun clientenan, ya cu hopi di nan ta gusta canta. P’esey a dicidi di bin c’un karaoke di Pasco. Algun di e clientenan a kies si pa bay c’un cantica di genero Gospel, pero mayoria di nan ta bay canta un cantica di Pasco.
META
Mas aleu Midi a bisa cu e meta principal di e festival di karaoke aki ta pa e clientenan di FAVI por haya sa di nan talentonan scondi, ya cu hopi di nan ta gusta canta. E actividad aki lo bay ta completamente gratis y e ta habri pa un y tur cu kier bin e mainta aki y asina disfruta hunto cu e clientenan di FAVI. Si nan lo algun producto na benta rib’e dia aki y tur placa cu nan genera, lo ta bay bek n’e departamento di FAVI. Loke FAVI lo tin na benta e dia aki lo ta obra di man, pero tambe algun snacks y bebida.
Por ultimo, Catherine Midi, stagaire di EPI na FAVI a extende un invitacion na e pueblo di Aruba en general, pa bin apoya e clientenan di FAVI. Algun di nan ta visualmente incapacita y algun di nan tin limitacion visual, pero cu e apoyo di e comunidad, esaki lo por ta un estimulo cu nan lo por sigui participa como miembro activo den nos comunidad.
