Fundacion Pa Nos Muchanan (FPNM) a organisa un seminario cu tin como titulo “Mayor ta pa semper, aunke no ta bou mes un dak” unda a enfoca riba e e diferente aspectonan di divorcio y separacion.
E seminario a habri cu un presentacion di Grupo Brasil Aruba Capoeira y Grupo Abada Capoeira unda nan a usa e forma di arte di capoeira pa demonstra un famia cu ta den e proceso di divorcio.
E seminario a sigui cu e prome orador, Sra. Enid de Kort kende ta un terapista di famia y pareha na Departamento di Asunto Social, cu a papia tocante e diferencia entre divorcio riba un nivel di pareha y e nivel di mayor y e importancia pa keda riba e nivel di mayor ora ta envolvi yiunan.
Sra. Shaska Kock, un ortopedagogo tambe di Departamento di Asunto Social, a sigui cu su presentacion tocante e efectonan cu separacion tin riba e yiunan y con e efectonan ta cambia segun e fase di desaroyo cu e mucha ta aden. Sra. Kock a ofrece diferente tips pa yuda e mayornan minimalisa e efectonan di separacion riba e yiunan. Despues di esaki, Sra. Yahaira Maduro, un Juridisch Deskundige di Directie Voogdijraad a presenta e aspectonan legal di divorcio y separacion. Sra. Maduro a duna un splicacion riba 4 terminonan legal (gezag, hoofdverblijfplaats, omgangsrecht, alimentatie) cu ta importante pa compronde ora ta regarda yiunan menor di edad.
A sigui e seminario cu un otro presentacion di Sra. Enid de Kort unda a pone enfasis riba e reto y caracteristicanan di un famia mixto (“blended family”) cu ta wordo forma hopi despues di un divorcio of separacion. E seminario a clausura cu un discusion di panelistanan unda a contesta varios preguntanan di e participantenen di e seminario. E discusion tabata uno hopi interactivo y loke a resalta durante e seminario ta cu mayornan tabata tin hopi pregunta tocante e aspectonan legal di divorcio y separacion. FPNM ta gradici cada persona cu a forma parti na e seminario aki y na cada orador pa nan tremendo presentacion, tambe un gradicimento na Setar pa nan contribucion.
