Recientemente, riba diasabra 12 di mei ultimo a tuma luga e 2do campeonato di Aruba Karate Bond na Compleho Deportivo Frans Figaroa. Aruba Karate Bond tabata tin e honor di a ricibi ‘Sensei’ Yanis Venizelos di Caracas, Venezuela kende no solamente a bin pa duna un seminario tocante e reglanan vigente di e Federacion Mundial di Karate (WKF) pero tambe a participa como arbitro na e 2do campeonato di AKB.
Banda di e arbitro internacional, AKB a conta tambe cu e presencia di señor Gerald Franca y señor Geoffrey HoAsjoe di ASU. Un total di tres scol di karate (Dojo Konishi, Shotokai Aruba dojo Shocokan y Dojo Shoshinkai) a participa na e campeonato aki cual a resulta di ta mesun exitoso cu e prome. Tur karateka a destaca e atardi aki. E categoria mas gusta pa publico tabata e categoria ‘rambuho’ unda e chikitonan a subi ‘tatami’ (e mat) y haci nan presentacion sin miedo. Henter e campeonato a bay bon y e karatekanan a disfruta di loke mas nan ta gusta.
E culminacion di e campeonato tabata e ultimo combate unda Kevin Lugo (Dojo Konishi) a topa cu Alejandro Gonzalez Lujan (Shotokai Aruba dojo Shocokan). Ya ta varios ocacion cu e dos karatekanan aki ta topa otro. Nan a duna publico un combate fenomenal. E biaha aki, e combate a resulta den medaya di oro pa Kevin Lugo y medaya di plata pa Alejandro Gonzalez Lujan. Den e mesun categoria a logra tambe medaya di bronze Gerwin Farro y Jefferson Valdez. Un pabien ta bay pa tur karateka medayista y tur karateka cu a participa.
E siguiente campeonato ta tuma luga riba diasabra 30 di juni 2018 y desde awor caba inscripcion ta habri! Aruba Karate Bond, bou di presidencia di Sensei Felix Tromp y señora Desiree Helder, ta gradici su directiva, tur sensei, tur coach, tur karateka, tur mayor y tur boluntario cu a yuda. Un danki special ta bay pa Comite Olimpico Aruba (COA), Aruba Sport Unie (ASU), Sport Subsidiecommissie Aruba (SSA) y Lotto pa Deporte cu ta sostene karate na Aruba.
