Segun e website di noticia Venezolano, notifalcon.com, riba e anochi di diahuebs pa diabierna ultimo, un patruya di e Base di Contrainteligencia Militar a detene dos sospechoso cu a purba traslada combustibel desde e costanan di e municipio Falcon pa Aruba. E detencion a tuma luga den e area Tumatey di e estado Falcon dor di funcionarionan di DCIM, ora cu nan tabata realisa un investigacion y a logra observa e hombernan, ambos di nacionalidad Hulandes, procedente di Aruba, den un embarcacion tipo speedboat cu matricula A900 y cu e nomber “Ki-Diaa”.
E dos sospechosonan tabata na canto di e costa, yenando e yate den e area menciona. Autoridadnan a logra confisca un pomp y slang cu ta uza den e practica aki.
E media Venezolano a informa cu un di e detenidonan tabata Minister na Aruba. E caso ta na disposicion di Fiscalia 23 di Ministerio Publico di Venezuela.
Ta bon conoci cu ex-Minister Wever ta frecuenta Venezuela regularmente. Na prome instante famia a bati alarma cu e ta perdi. Despues nos a haya contacto cune y a resulta cu ta problema e tin cu autoridadnan Venezolano. Y awo prensa ta informa cu a detene pa motibo di contrabanda di combustibel.
Hecho ta cu gasolin na Venezuela ta HOPI mas barata cu Aruba. Ultimamente e “negoshi” a bira asina lucrativo cu Gobierno di Aruba a opta pa adapta e maneho. Pero asina mes, henter e proceso ta ilegal, solamente cu e ta sali ilegal di Venezuela y ta drenta legal Aruba, pasobra aki ta paga impuesto riba dje.
Nos no a logra haya comunicacion cu Booshi Wever despues mas.
