Dialuna dia 9 di november ultimo sra. Marisol Lopez-Tromp, Ex-Minister y ex-Parlamentario, a duna un presentacion via Zoom pa e studiantenan di e promer aña di e estudio Organization, Governance and Management (OGM). Esaki tabata su di dos presentacion como cu aña pasa tambe e tabata invitado.
Sra. Lopez-Tromp a papia tocante di e tareanan di un Minister den e proceso di traha y ehecuta maneho. Otro topico tabata e rol di Parlamento, ambtenaarnan y conseheronan. Tambe el a elabora riba politica en general na Aruba y e rol cu Reino y relacionnan internacional ta hunga. Despues di e charla studiantenan a haya oportunidad pa haci pregunta na sra Lopez-Tromp.
Cada aña e docentanan Luciano Milliard y Helmut Vink ta invita den cuadro di e curso Governance, Policy and Organization (GPO) diferente personan cu conocimento di e materia di politica y maneho. E meta ta pa e profesionalnan di futuro conoce di serca e lidernan den comunidad cu ya pa hopi aña (t)a traha na bienestar di Pais Aruba den diferente funcion.
