Minister presidente demisionario mr. Evelyn Wever-Croes tabata encarga cu e cartera di energia pa casi cuater aña. Pero durante ora di mainta el a traspasa e cartera aki pa minister demisionario Glenbert Croes, kende despues di huramenta dentro di algun dia lo ta encarga cu esaki.
Pa loke ta e parti di huramenta minister, Wever-Croes ta kere esey lo tuma luga na final di e siman aki, pero el a cuminsa prepara tur cos pa traspasa cartera. El a cuminsa cu su preparacionnan. Pero despues cu gobierno a cay, segun e mandatario demisionario, el a pidi tur minister un overdrachtsdocument, documento di traspaso.
A haci esey p’asina cada uno por traspasa tur e carteranan, e informacionnan pa esun cu ta bin despues ta bin di nan. Nan sa caba con e siguiente gobierno lo ta forma y ki cartera e ministernan demisionario no tin mas. Awe a toca e prome cartera, cual Glenbert Croes lo bira minister di energia. Durante nan encuentro, a repasa tur loke a haci den e casi cuater aña.
“Awe mi tabata tin e oportunidad, e privilegio pa di banda di nos minister president y actual minister di energia, haya e documento di e overdracht di e portofolio di ministerio di energia”, minister demisionario Glenbert Croes a informa. E ta considera e vision cu nan minister presidente a pone pa Aruba. Esaki t’e fundeshi riba cual Croes su trabou awo lo ta pa acelera e implementacion dje vision cu el a ancra p’e plan di accion cu e lo hiba como maneho como minister di energia nobo.
Pa cobertura mas amplio, lesa e edicion di TREMPAN mañan.
