ASTEC ta basta den noticia. E problema di huma di WEB nunca a stop. Gobierno a bisa hopi cos cu mester a tuma luga pero en realidad e cambionan aki nunca a logra.
E molester di huma ta presente y casi tur dia e trahadornan mester stop nan trabou pa algun ora mirando e problema cu tey keto bay. Hopi overtime mester wordo traha pa asina e barco por sigui y otro drenta.
Oranan largo ta bay perdi pa motibo di e huma di WEB. Mientrastanto awor e crane di ASTEC ta plat plat. Motibo ta cu un tripulante di un barco di container haciendo cierto trabou a comete un eror grandi y laga un hero pisa cay. E hero Danki Dios no a causa daño personal. Si esnan cu tabata tey a bisa cu a scucha un sonido fuerte y un explosion tambe. E hero grandi a cay riba un kabel di alto voltahe cu ta duna e crane coriente.
E caida a kap e kabel causando e explosion y manda e crane mesora for di servicio. Awor aki lo por dura basta pa e crane bay bek den funcion. Esey no nifica cu e trabounan lo para. E crane lo keda for di servicio pero lo causa un tardansa den e proceso di baha container. Lo usa e crane mobiel cu tampoco ta 100% segun e trahadornan. E mantencion ta laga di desea. Ademas cu e crane mobiel ta tarda pa baha container. No ta manera e crane grandi.
Barconan tambe tin nan crane pero den e caso di e crane di barco y esun mobiel ta ambos ta causa tardansa den e proceso ora di subi y baha container. E gastonan di e daño ta core den hopi placa. E compania di e barco mester bay cubri e gastonan aki pa un eror cometi pa un tripulante di e barco di container cu tabata mara bou di e crane grandi. Awor cu e problema di huma y crane daña por ta un problema cu por afecta e servicio.
