Wilson Acevedo Sosa a caba di sinta su castigo y tur cos tabata cla pa pone riba un vuelo di Sto Domingo pa e keda deporta for di Aruba.
Sinembargo prome cu e por a subi e avion y lanta vuelo, el a haya mal noticia. En realidad, e no a haya chens pa yega aeropuerto mes, ora cu el a haya informacion cu e mester bay KIA bek.
Kico a bay robes”
Wilson a haya un condena di tres aña di castigo y dado momento prome cu el a cumpli tres aña, e decision a cay cu e por sali y lo deporte di biaha pa cual a mand’e Warda Nos Costa, en espera di su salida for di Aruba.
E mama, Ana Maria Sota Nuñez, a bisa cu nan tabata hopi desilusiona cu e eror aki di Ministerio Publico, pasobra nan tabatin e ilusion cu su yiu por a wordo manda Santo Domingo bek prome cu fin di aña. Tabata falta solamente 11 dia pa e por bandona Aruba, ora cu nan a buske bek.
E mama bou yoramento a splica si tabatin un caso pendiente, nan no mester a crea ilusion falso cerca nan cu e por bay su pais bek. E ora mester a lague na KIA.
Segun el a bisa, e ta realisa cu su yiu tin problema di agresividad pa cual el a dicidi di biaha hunto cu ne pa Rep. Dominicana unda cu e lo a keda di busca ayudo profesional pa e hoben.
Loke nan no por a compronde ta cu tur e tempo e dos aña y mey cu e tabata cera den KIA, Ministerio Publico no a realisa cu e tabatin un caso pendiente of tabata envolvi den algo cu sigur mester a sosode mas cu tres aña pasa.
OM
Segun informacion cu a haya, e meneer aki tin dos condena. E prome caso, cu ta e castigo cu el a sinta, ta di 5 augustus 2017 y 27 januari 2018. Pa esaki el a haya un sentencia riba 18 di januari 2019. E otro caso ta algo cu a sosode dia 10 di juni, 2018 pa cual el a presenta den Corte riba 27 di september, 2019. E sentencia ey el a apela y aunke cu e tabata den Hof e siman aki, a pospone su tratamento pa maart, 2021. Esaki ta e caso cu no tin decision final ainda riba dje y pa cual e mester caba di sinta e castigo ey, pa cual e tin un condena caba pero a apel’e. Awo e mester warda te e tratamento den luna di maart.
Esaki ta e splicacion cu famia a haya tambe for di ministerio publico.
