Kico ta pasando riba Aruba? Mi Dios Santo! Demasiado scandal ta pasando tras di otro. Nos por corda cu parlamentario di MEP a exigi cabes di e persona cu tabata traha na Algemene Rekenkamer, pasobra el a papia un tiki duro na Burger King. Awo e mesun parlamentario aki a bira mudo y no ta bisa nada mas.
Si e ta conta p’e e lo mester ta conta bo gobierno tambe. Acaso gobierno a tuma luga di Dios, pasobra nan maldadnan no ta conta? Nos por corda con e politiconan di partido AVP tabata yama pa tur sorto di cos. Awe scupi cu nan a lansa na laira a cay den nan cara. Por ta p’esey tur hende ta keto. Esaki ta integridad? Nos no ta nan, pero nos por mas miho cu nan. Claro e parlamentario di partido MEP mester keda keto keto pasobra sino lubida gobierno.
Nos por a scucha cu lo no duna pueblo oportunidad pa paga impuesto riba number di auto despues di 31 di januari. Tur aña tabata extende e periodo, pero awor diripiente no mas. Despues cu a bin cu BBO na frontera tabata kier pa luna di december caba paga e belasting riba number di auto. Nos gobierno no tabata kier pa nos pueblo recorda e binimento di Hesus na e mundo aki y tampoco e aña nobo.
Otro prueba cu nos gobierno kier caba cu tur celebracion cristian probablemente cu e intencion pa pasa e ley di matrimonio di mesun sexo manera ladron den anochi y haya caminda habri pa sigui indoctrina nos hubentud cu un enseñansa cu mas y mas ta alehando di nos fe cristian. Pueblo no por permiti pa gobierno sigui cu Sustainable Development Goals. E metanan di e Sustainable Development Goals lo tin como consecuencia cu e bienestar di nos futuro generacion ta na peliger y mas medida lo ta introduci. E medidanan cu tin, tin nos pueblo strangula. Locual cu gobierno kier logra pa tur hende biba den pobresa. E paisnan manera na Cuba y Venezuela ta un bon ehempel.
Fiesta ta bon, pero corda riba mañan. Nos tin sigur cu mayoria di nos pueblo ta desea pa e gobierno aki bay cas pa caba. Nos no tin e fecha y e ora pero un cos ta sigur cu e tempo di Dios ta perfecto. Na Europa e agricultornan a cansa di e gobiernonan socialista y nos por mira cu e mecha a cende na Europa. Spaña, Portugal, Francia, Luxemburg, Belgica, Alemania y Hulanda. E agricultornan ta den un protesta pisa.
Mundialmente lo bay tin scarsedad di cuminda. Si PVV no sali na defensa di e agricultornan, e por wel di lubida di lo keda e partido mas grandi na Hulanda. Di mes nan a vota contra pa kita e BTW for di fruta y berdura pa yuda e pueblo Hulandes, ya cu eynan tambe e prijsnan a bay halto. Tempo lo bira hopi dificil, pero tur hende lo haya sa cu tin un Dios na Aruba. E agenda di Sustainable Development Goals gobierno por hinc’e den nan maleta paso nan lo core bay sin mira patras. Rond mundo e agenda 2030 a cuminsa cay den otro y e gobernantenan sa kico ta spera nan. E agenda aki lo cay aki na Aruba tambe. Partido Curpa ta e alternativa.
