Despues di tanto fanfaria den nos parlamento caminda gobierno cu kier hustifica nan maneho desastroso pueblo ta sigui sufri. Nos tin un gobierno cu a manipula cu e acuerdo cerra cu Eagle LNG y ta dicta riba nos Parlamento. Con un Parlamento asina lo por controla gobierno den e forma aki? Awe mi no ta bisabo e berdad mayan si.
E tarea di nos Parlamento ta pa controla gobierno. E tarea di controla ta pa para cosnan cu ta bai contra di e bienestar di nos pueblo di Aruba. Eagle LNG ta firma un contract cu un compaña cu gobierno di Aruba ta 100% doño esta WEB N.V. pero ningun hende por haya sa e contenido di e contract ni e ministernan paso e ta secreto. Pueblo pork ere e cos aki? Kiko ta e motibo cu tin asina tanto cos di sconde? Ta ora tin maldad so tin secreto. Si tin cosnan malo den e contract con nos Parlamento por ta complice di apoya maldad aki?
Lamentablemente nos parlamentarionan ta inocente y ta bai di acuerdo pa apoya gobierno sin mas. Nos mester puntra nos mes si ta bale la pena pa tin un Parlamento? E postura cu nos Parlamento a tuma nan a perde tur poder di hasi nan trabao na bienestar di e pueblo di Aruba. E parlamentarionan aki a huramenta pa sirbi nan partido? Of ora nan a hisa nan man na halto pa huramenta nan a hura cu nan lo sirbi nan pais den tur honestidad? Wel wel esaki sigur no ta e caso aki na Aruba. E acto aki ta mesun cos ora bo ta firma un documento sin sa e contenido pa despues bo haya e sorpresa cu bo mes a firma pa entrega bo cas. Esaki ta locual cu nos parlamentarionan kier pa Aruba?
Nos parlamentarionan a dicidi di tuma e routa di menos resistencia? Y hasi manera tur cos ta bon y nada malo a pasa. Un parlamento cu ta sigui apoya cosnan malo y kier hustifica cu nan maneho ta excellente. Ta parse cu aki na Aruba e tuerto ta Rey paso tur hende ta ciego.
Gobierno ta sigui abusa di e clase trahador cu ayudo di Hulanda. Ta pidi e clase trahador pa sacrifica y di otro banda ta emplea 142 trahador. Gobierno ta corta tur caminda pero tin placa pa emplea 142 trahador. Ta sacrifica nos grandi nan y esnan mas vunerabel di nos pais. Nos pueblo di Aruba ta ciego?
Ora bo drenta un supermercado bo ta mira cu productonan ta subi mas cu 50%. E clase trahado ta sigui bai atras den su poder di compra y nos isla tin gobierno cu ta sin vision y unico cos cu e conoce ta medida riba medida. 2022 ta un aña caminda lo bai tin hopi sorpresa ainda.