Empleadonan di Fundacion pa Hende Muhe den Dificultad a dicidi di pone trabou abou, pasobra nan no ta contento cu nan situacion. E empleadonan a walkout pa motibo di no a cobra nan salario di augustus ainda.
Magali Brito di SEPPA, a splica cu e empleadonan ta pendiente pa cobra pa dia 24 di augustus, pero den e ultimo lunanan tin cambio. Luna pasa nan a cobra laat, pero awo ta dia 2 di september y ainda no a cobra. E empleadonan ta rabia y tin nan obligacionnan, tin intimidacion, hasta a bisa nan cu lo cobra dialuna pero esey no tabata e caso.
E situacion aki ta pega na e directiva di fundacion, pasobra tin cambio di tesorero. A bisa cu e pago a bay banco, pero nan no a ricibi nan salario. Segun Brito, awendia cosnan ta bay mas facil y nan mester a haya salario caba. E sindicato tabatin contacto cu e presidente di directiva, kende a bisa cu dialuna cu a pasa nan lo cobra y esaki no a pasa.
E walkout tabata e prome paso di accion pa mustra nan malcontento, mientras nan ta warda riba un solucion a corto plaso. Si esey no sosode, lo depende di e empleadonan si esaki ta dura te ora cu yega na un solucion. Algun rato despues di e entrevista cu 24ora.com e empleadonan a haya nan salario deposita den nan cuenta di banco.
