Nos ta den temporada ainda di hopi áwaseru kaminda nos tur sa ku kayanan ta inundá òf awa ta keda para na algun sitio pa dianan largu despues ku e yobida di awaseru pasa.
E situashon ideal lo ta, pa evitá molèster mas tantu ku ta posibel, dor di drecha infrastruktura, limpia roinan i kontrolá afvoernan ku ta yen di shushi i kongestioná.
Nos ke duna un ehèmpel i ta pone Minister na altura di un situashon den Dominguito, pa ta mas eksakto den Granaatappelweg, kaminda awa ta keda para dilanti un sentro pre eskolar i konsekuentemente ta trese hopi molèster pa mucha, mayor i trahadó di e sentro pre-eskolar en kuestion i habitantenan di e kaya. Por sierto e problemátika aki ta manifestá na komienso i final di e kaya aki.
Nos ke enfatisá si ku tipo di situashonnan asina ta sosodé tambe den otro kayanan na Kòrsou kaminda tin skolnan i sentronan pre-eskolar.
Den e kuadro aki nos tin e siguiente preguntanan pa Minister:
- Minister ta na altura di e situashon aki den Granaatappelweg den Dominguito?
- Minister ta na altura di otro kasonan na Kòrsou di awa ku ta keda para dilanti sentronan pre eskolar i skolnan?
- Minister ta di opinion ku mester evitá e molèster aki pa nos muchanan ku tin ku frekuentá sentronan pre eskolar i skolnan diariamente?
Nos a tuma nota ku mester hasi un “inhaalslag” pa loke ta uso di fondonan ku tin reservá riba presupuesto 2018 pa drecha kaya ku no por pasa pa 2019.
- Minister por bisa Parlamento si Granaatappelweg ta riba planning pa keda drechá?
- Minister por bisa Parlamento si Minister ta bai hasi lo máksimo pa aliviá e situashon dilanti e sentro pre eskolar den Granaatappelweg i tambe dilanti otro sentronan pre-eskolar i skolnan?
