FTA ta negocia a base di un formato standard cu e ta uza pa hotelnan y kier impone esaki riba restaurantnan pafo di hotel cu no tin ni e mesun sistema di entrada ni tin e previlegio di paga menos winstbelasting manera un restaurant di hotel. FTA kier gana placa di miembresia sin dedica atencion na e situacion particular di El Gaucho Rsstaurant.
Hopi restaurant ta cobra “service charge” y ta keda na cada restaurant y den e caso aki gerencia di El Gaucho pa dicidi con ta uza of parti esaki. Tin diferente compania cu ta uza ful e service charge pa yuda cubri un salario minimo na empleadonan. Un dado momento El Gaucho tambe a dicidi di cobra un service charge di 15% na cliente.
Na El Gaucho e empleadonan cu a manifesta ta cobra un salario basta mas halto cu e minimumloon. Riba di esaki desde mas un menos 30 aña pasa El Gaucho a dicidi riba su mes pa reparti un tercera parti (5%) di e service charge entre tur empleado cu ta traha den e restaurant, incluyendo esunnan cu ta traha den cushina, oficina, maintenance y cierto manager.
Esaki a base di e principio di solidaridad entre coleganan y cu tur miembro di e ekipo ta contribui cu e servicio y e experiencia di cliente. Tur e empleadonan aki y coleganan di e miembronan di FTA tambe ta parti di duna servicio na El Gaucho. E parti di e service charge pues ta un extra pago riba e salario basico cu ta mas halto cu diferente otro restaurant aki na Aruba.
Awor FTA kier exigi ken si y ken no ta comparti for di e 5% aki. Nan scogencia ta netamente basa, no riba ken ta duna servicio, pero ken ta miembro di FTA. Of ken nan kier inclui pa asina nan por cobra mas miembresia. Remarcabel cu FTA mes ta mustra di ta discrimina entre e trahadonan.
Lo ta bon pa ora nan dicidi di comunica cu media, nan comunica informacion corecto y no crea storia. Tambe si prijsnan di El Gaucho a redobla manera FTA ta pretende, esey kiermen automaticamente cu e empleadonan ta gana mas via nan parti di e service charge. FTA ta lubida con e prijsnan di cuminda incluyendo carni, galiña y berdura a subi ultimo tempo.
Tambe e prijs di flete. Of FTA ta ignorante riba e subida aki of e ta kies pa papia cu dos lenga? Ademas, cu salario of entrada no ta subi manera prijs riba menu subi tampoco ta corecto. Es mas, ora cu salario minimo a subi na januari 2023, El Gaucho riba su mes a dicidi di subi salario di tur empleado cu e mesun porcentahe. Esaki ta algo cu ta usual na El Gaucho.
Esaki tambe ta algo cu FTA ta lubida di menciona pa asina pinta gerencia den un luz negativo. FTA ta gaña su miembronan y prensa cu gerencia ta y a ofrece pakete pa afecta FTA, esey no ta berdad. Desde pandemia a bin ta ofrece pakete na trahadonan cu varios a tuma. Esaki no tin nada di haber cu FTA pero atrobe ta malinforma su miembronan.
Locual FTA tambe no ta menciona ta con hopi tips e waiternan ta gana den nan man y ta nan ta dicidi si nan ta duna nan coleganan algo. E mesun coleganan cu ta yuda nan como parti di servicio na El Gaucho cu ta cuminsa ora cu un hende yama pa haci un reservacion te ora cu nan caba di come den un luga limpi. E ta mas cu claro cu e miembronan di FTA kier e hancho pa nan so y no pa nan otro coleganan. Aki atrobe FTA ta mustra cu leu a leu e ta lubida e noble causa di sindicalismo y interes di trahado.
