Den rueda di prensa di dialuna, sindicato SADA a expresa nan preocupacion riba e publicacion riba Facebook di e Minister di Finansa, cu ta encarga tambe cu Cuerpo di Aduana, tocante e Landsbesluitnan (LB).
Recientemente Minister di Finansa, mr. Xiomara Maduro a publica cu nan a manda tur 168 Landsbesluit pa e structura nobo di salario nobo pa Aduana pa Gobernador.
Presidente di SADA, Edward Maduro, a cuestiona e echo cu pa dos aña largo e gobierno aki a sinta hunga y alarga e asunto aki, cual SADA ta haya un falta di seriedad. Ora cu e Gabinete Wever-Croes I a drenta na 2017, tur cos tabata cla caba. Tabata falta solamente pa establece e LIM pa firma e LBnan. Pero con por tarda 5 aña pa firma e LBnan. Esaki ta loke nan a purba splica na e minister, pero na no ta haya atencion for di nan minister.
Pa un motibo of otro, Minister a haya ta bon pa perhudica henter un cuerpo di Aduana, no solamente e geuniformeerde diensten, pero tambe esunnan den e ramo administrativo. Hopi hende den Aduana sa cu esaki tabata regla caba. SADA tin varios aña den corte caba. Sindicato ta haci su maximo pa keda cla cu esaki.
Por bisa di awo caba cu lo tin 168 caso den Corte, ya cu no a respeta loke a firma na 2017. A pesar di cu e gobierno aki, e Minister di Finansa y prome minister, a priminti di lo cumpli. Pero na 2019, ora cu Duana a welga, e momento ey e berdad a bin dilanti, ora cu nan a bin haya sa cu nan a pasa un cuchiu den henter e cuerpo.
Pa dos aña largo nan a priminti di lo cumpli y te dia di awe, nada. Ora cu ta traha duro y serio, no ta traha serio pa perhudica e cuerpo. Y esey ta netamente loke e minister a haci. SADA ta lamenta e publicacion di e Minister. Henter e cuerpo ta demotiva, danki na e gobierno aki. Nan a bay corte y cual caso nan a perde, pero sindicato a apela esaki y nan ta en espera di e veredicto den Corte di Apelacion.
