Education USA Aruba ta lansa un estudio dirigi na tur alumno di diferente scol na Aruba. E meta di e estudio ta pa midi e interes di esunnan cu ta interesa pa bay studia afo y identifica esunnan cu ta considerando fuertemente pa bay Merca.
Education USA ta un red (network) di e Departamento di Estado di Estados Unidos consistiendo di mas cu 430 centro internacional den mas cu 175 pais rond di mundo cu e meta principal pa promove estudio na Merca. E red ta traha solamente cu institutonan acredita den tur ramo.
Dia 15 di october 2020, Minister di Enseñansa, Ciencia, y Desaroyo Sostenibel, Armando Rudy Lampe, y Consul General pa mision di Caribe Hulandes, Allen Greenberg a inaugura e oficina di Education USA na Aruba, como un di e prome islanan den Caribe pa tin representacion den e region. Consulado Mericano na Corsou lo sostene e oficina cu material y training pa staf. Actualmente Aruba tin varios MOU firma cu diferente institucion na Merca cual ta ofrece beneficio y reduccion den tuition (schoolgeld) entre otro, un esfuerso di Minister Plenipotentiary di Aruba, Joselin Croes. Conseheronan di Education USA Aruba por asisti tur individual cu ta interesa den persigui un oportunidad pa educacion na Merca.
Ta pidi cooperacion di alumnonan den MAVO/ HAVO/ VWO/ EPI of na un High School den klasnan 10, 11 of 12 y/of Universidad cu tin interes pa bay studia afo pa yena e encuesta aki cu lo dura solamente 3 minuut pa completa. Link pa e encuesta: https://www.surveymonkey.com/r/GLBVQPL.
E informacion lo contribui na yuda e team di Education USA Aruba identifica e necesidad di e comunidad pa asina miho informa y guia e studiantenan. Tur studiante cu kier bay studia na Merca por tuma contacto cu Education USA Aruba via e-mail [email protected] of bishita nos riba facebook @educationUSAAruba.
