Parlamento di Aruba, Corsou y Sint Maarten a reuni recientemente na Corsou den marco di e Tripartite, caminda e tres Parlamentonan ta delibera riba e temanan cu nan tin en comun y busca e posicionnan, unda cooperacion por fortalece e paisnan Caribeño dentro di Reino Hulandes. Pero cooperacion, pa parlamentario Eduard Pieters (PPA), no ta nifica cu Aruba mester entrega derecho cu e ya tin.
Un di e temanan cu a discuti riba dje, ta e futuro di articulo 58 di Statuto y e iniciativa na Hulanda pa adapta e articulo aki. PPA su posicion ta cla: si Corsou y Sint Maarten kier haya e mesun derecho cu Aruba pa determina nan propio futuro dentro of pafo di Reino Hulandes, nan mester por haya esey. Pero no door di debilita e posicion cu Aruba ya a logra. “Nos, como generacion nobo, no por hala ni un milimeter atras di loke a wordo acorda pa Aruba hopi aña atras,” Eduard Pieters a enfatisa.
No ta un cambio tecnico chikito
Articulo 58 tin un significado particular pa Aruba. E ta regla e posibilidad pa Aruba termina e orden huridico estableci den Statuto, bou di e condicionnan specifico.
E iniciativa pendiente na Hulanda ta busca pa extende e posibilidad ey na Corsou y Sint Maarten. Pero simultaneamente e proposicion ta cambia e mecanismo, cu actualmente ta conta pa Aruba, incluyendo eliminacion di referendum obligatorio y e rekisito di mayoria di dos tercer parti den e procedemento actual. Pa Pieters, ey ta precisamente unda Aruba mester ta alerta. PPA no ta contra pa Corsou y Sint Maarten haya e mesun derecho cu Aruba. PPA ta contra cu, pa duna nan e derecho ey, Aruba mester entrega parti di su propio garantianan. Pues simplemente bisa: Eleva otro pais na e nivel di proteccion cu Aruba tin.
“Aruba mester dicidi riba su propio destinacion”
Pa Pieters, e debate no ta principalmente tocante independencia. E ta tocante ken tin e ultimo palabra riba futuro constitucional di Aruba. Si algun dia un generacion futuro kier reconsidera Aruba su posicion dentro di Reino, un decision di e magnitud ey mester carga suficiente peso democratico. PPA no ta bisa awe cu Aruba mester sali for di Reino. Tampoco e ta haci un debate pro- of anti-Hulanda. Pero PPA ta defende un principio: futuro constitucional di Aruba mester keda den man di pueblo di Aruba y su institucionnan democratico.
Loke generacionnan anterior a logra
Pieters ta pone articulo 58 tambe den un contexto historico. E posicion particular cu Aruba tin den Statuto, no a bin automaticamente. Esey ta resultado di un trayectoria politico y constitucional cu e generacionnan anterior a lucha y negosha p’e pa nos logra awe nos Status Aparte, nos Constitucion.
Pa Pieters, generacion politico di awe tin pues un responsabilidad: No entrega facilmente loke otro generacion a conkista.
Corsou y Sint Maarten kier e mesun garantia?
“Ningun problema! Nos lo sostene nan tambe.” Pero segun Pieters, solucion mester ta pa nan haya e mesun derecho, no pa Aruba perde parti di su derecho. Igualdad no mester nifica retroceso pa Aruba. E Tripartiet ta precisamente un plataforma pa Aruba, Corsou y Sint Maarten traha hunto riba e interesnan cu nan tin en comun. Pieters ta sostene e cooperacion ey, pero pa PPA, cooperacion entre e tres paisnan mester fortalece nan posicion dentro di Reino, no debilita derecho di ningun di nan. Esey ta pakico su mensahe despues di e reunionnan na Corsou ta cla: “Si Corsou y Sint Maarten kier e mesun derecho cu Aruba, duna nan e mesun derecho. Pero loke Aruba ya a logra den Statuto, nos no ta entrega ni un milimeter di dje.”
